當討論區上見到有人講你（公司）

最近肥龍公司發生辦公室以外既小風波．

事端係喺一個本地討論區上，見到有關敝公司既貼文，（大概）內容係大爆敝公司某部門及個別人士既（臭）史及一啲當事人既內幕，更附設最不受歡迎人仕選舉供閱覽者投票，非常熱鬧．而故事既下半部係呢件事件及有關貼文，經已流入公司高層上面．雖然貼文係用中文寫，外籍老細唔識睇．不過經有關人仕傳譯，加埋online translator，外籍老細已經大概明白當中內容及意思，並且（表面）非常震怒．

對於呢件事既上下半部，作為旁觀者，肥龍有少少睇法．

就貼文及其內容本身，貼文者口口聲聲話自己只係想將真相話俾其他人知，唔想有人再受害或個別人繼續得呈，咁講真，肥龍都唔完全清楚與事實有幾多真確，可能真係八卦完就算．不過咁做可唔可以幫佢達到目的，真係值得商榷．

雖然未講到家醜不出外傳咁嚴重（況且其實肥龍自己都耐唔耐喺度寫公司發生既事件），不過講到話要爆「真相」，咁呢個情況，只可以講係其中一方既版本．但係如果去到指名道姓去寫其他人的話，就似乎過咗火啲囉．因為喺大部份情況下，討論區雖然貴為公開平台，不過被寫既人，除非又係到訪者，加上又唔係咩公眾人物，其實未必知道有人寫緊佢．咁喺呢個情況下，就對被寫既人欠公允．而且，貼文者只係用別名，對方就算想回應，可能都無從入手．反正呢類回應，都係唔做好過，一黎對方係邊個都未知，二黎都無謂為他人製造更多茶餘飯後既話題．

除咗內容本身，肥龍反而想帶出其他人普遍點樣評價其他同事既情況．唔知由幾時開始，唔少人都會幫其他人笠「聖人」、「完人」呢頂光環．冇料冇經驗冇學歷當然唔需要講，不過如果連其他人既私生活，傳聞，內幕人事安排等人都上崗上線的話，就顯得貼文者既小氣及意氣．而且咁只要見到些少問題，就推到別人身上．

工作上，只要各自喺自己負責既崗位上做好份內事或處事公正，其實已經足夠．至於話有冇料既問題，有時睇到都想話兩句，就係睇事物唔好睇得太表面，而且每件事內既考慮及安排亦可以好複雜，單睇結果未必知道事件既全部．咁喺利益前題下，好多時都會有得有失，好難每次每個人都開心．而且又想知道，當寫其他人時，其他人又可唔可以咁寫番你呢？

不過有時諗，如果真係有心做好或反映事實，公事上，其實兩方不妨直接對話吖．總好過益咗其他（不知情）既人，小心黃雀在後．

咁至於外籍老細果邊既下半部，肥龍簡單講就係水清無魚，就由得佢發生，而且內裡誰是誰非，好難定奪．如果可以講道理討論當然好，否則如果刻意干預，甚至偏袒一方，可能只會換來官官相衛，壓打基層既聲音．

你快樂嗎?

快樂本當就無罪，但點解好似唔快樂咁既？

之前都有睇過同一劇團做【二十出頭】及徐羨曾既【一篤戲】．上星期五睇咗【快樂無罪６向起點出發】，一如已往，歡樂今宵式既表演／表達方式，又做又唱，扮女仔細路大人，扮易太太，扮志豪飲局，又扮變型金剛，題材內容主要環繞過去一年香港社會發生既大小事件，加以註釋、挖苦，言之有物．

而喺人少少既麥高利小劇場做，可以同觀眾互動又幾特別．

新年剛開始，就如劇名所講，向起點出發，開開心心，感覺相當不錯．

==============================
主辦：三角關係: Trinity Theatre
演出︰馬志豪、徐羨曾、譚國明
==============================

給H的信

H,

我刻意選擇喺半年後既今日先寫呢封信，係因為我都想利用時間去睇番我當日做既決定，以及我當日所說既論點到今日是否依然站得穩及兌現．

三個月前喺一個同事既婚宴裡, 再次遇見你. 雖然外貌上大家變化唔大, 但氣氛已經告訴我知，所發生呢件事你似乎仲未放開，相信你依然惱我，不願跟我呢位前上司再談話．其實，再談話同唔談話唔重要，不過這種氣氛，老實講，我真係未可以習慣．

回想六個月之前, 當你同我討論關於你那個星期後離職既安排及善後工作時, 我感覺到你對已經工作咗五年既環境依依不捨. 我知道你對我提及既結果失望, 更加唔知係咪因為呢件事令你當時病倒. 不過, 作為你既上司既我, 只可以講呢個係管理上既決定, 而其實過程中心裡都絕不好受.

再記得及後再一個半月前既一件事件, 因為另一個部門同事既處理手法, 令你覺得你既意見不受重視, 結果隔無幾耐你決定向我請辭. 儘管後來大家傾咗好幾次, 而我亦將呢件事上既睇法同你加以分析, 希望你可以用多一個星期時間再去詳細想呢個決定. 但到最後我始終無法改變你最初既想法. 對於當時你離開既決定, 我非常尊重.

後來, 因為某些原因, 我再向你重提呢件事. 這次, 我表示如果你可以收回請辭, 或者事情會有個變數．而當時，你已經表明願意留下繼續效力，只可惜公司突如其來政策安排上既縮緊, 最後亦未能改變呢個結果．有關整件事既睇法, 坦白講, 正如我之前同你講, 你呢次似乎真係過激及敏感咗. 而且你所堅持既, 對我黎講, 並非全無辦法解決, 但若真係要立刻處理, 當時我又確係無能為力. 我最後又只好接受呢個結局.

依家半年已過，再留意當日我跟你講既情況及我所提出既建議，的確有所改善及比之前明確，只係對象換咗另一個．但係，我並唔係想再向你表達甚麼, 只係想再講（我覺得）有啲事（特別係公事）並非全無解決辦法，只要相信及努力，加上時間，還是可以改變到．

祝你工作愉快！

肥龍上

避風塘舊貌

肥龍閒時都會四處去搵有關香港仔避風塘舊貌既相片. 有一次跟好友P講起呢個話題，竟然發現原來好友P擁有一張非常珍貴既避風塘相片.

相片來源、拍攝時間及地點，好友P並冇透露，而且可能都唔知．不過從相片所見，重建前第一代石排灣邨正在興建中，黃竹坑邨更未見蹤影. 而現在香港仔海旁填海所得一帶，依然為泊船地方，初步估計拍攝時期大約為1965-1968年間．

而從相片中，由近既香港仔/鴨脷洲開始遠望至壽臣山／深水灣一段，可以清晰睇到由香港仔至黃竹坑一段沿海既交通路線．而且，更可以見到香港仔海旁、石排灣、黃竹坑、深灣及鴨脷洲各處尚未開發時既舊貌．而避風塘方面，可以見到由避風塘可以一直伸展到現在黃竹坑明渠地點.　當時整個避風塘內除咗漁船處處之外，就原來已經有珍寶、太白海鮮舫在中央．

最後，都要講句，多謝好友P送我呢張相片.

To be or not to be

對於同事請辭既情況，有時真係覺得非常無奈．雖然魚唔過塘唔會肥，而且亦無謂阻住呢位同事發展／發達．喺初步摸清同事底線及考慮可能方案下，既然同事去意已決，唯有欣然接納．最多快快手搵番個替補．

不過肥龍對同事談請辭問題時有兩個底線. (一)就算，只係就算，唔一定完全係事實，肥龍知道同事下一份工或其公司既情況及消息，肥龍一概唔會透露; (二)唔會抺黑其他公司，不論任何情況．

始終生水有相逢，更可以係道聽途說，況且唔見得蔽公司天上有地下無，值得同事留喺度打一世工．

講番同事請辭，問題係喺呢個情況，發現原來可以（想）做到既，會比想像既少．

如果個同事係跳去同行，起碼都大概估到對方出手，可以同同事分析一下兩邊情況．咁，如果真係有能力可以挽留得低咯，咁個同事就算真係要推咗新既offer，都應該唔會太麻煩兼冇咩考慮．　

反而問題係肥龍身處既圈子好細，若果換轉同事係跳去(大)客果邊，情況會大大唔同．除咗offer上未必可以直接比較外，喺挽留同唔挽留既考慮上，有可能仲會夾雜咗與客戶間既關係，間接變得想挽留而不能挽留．加埋老細旨意，真係會眼白白咩都唔做．可以話，想挽留而挽留唔到又煩，到挽留到既，手尾可能會仲長．

而且若果遇著啲做到野既同事，知道佢下一份係份唔錯或好工（真心覺得），咁就唔想阻住呢位同事發展／發達，情願祝福佢兼由得佢走囉．

所以，有時留同唔留，好鬼腦交戰，仲會有好多故事．

蒔絵

以前去日本百貨公司見過，除咗靚，就係覺得貴．今次旅遊，由於宮城県還保留唔少傳統手工藝作品制作，有機會參觀，再細心欣賞，覺得好別緻．

蒔絵題材圖案傳統，但又簡單．上網找尋有關資料，發現原來工序繁多又精緻，又分唔同流派，大有學問．

蒔絵已經應用喺貼紙技術及其他日常物件上，新舊交替，別有另一種味道．

另外，仲有塗上不同蒔絵既木器，非常典雅．

阿may...阿may...魔鬼出黎 (聖誕交叉扑之場外加長版)

有日突然收到二打六兄既電郵, 打開一讀，得知二打六兄上次聖誕交叉扑後意猶未盡，心中故事思潮起伏， 有話想說. 上回既「話飲咪飲、話走就走」原來仲有下回， 而且今次過程比上次更直接，同時又感覺到二打六兄最後既反思(其實我有冇講錯? ^^).

依家，肥龍就係呢度為呢個聖誕交叉扑之場出外加長版揭開序幕! 最後除多謝二打六兄呢篇之外, 就係因為交叉扑認識多一位有趣既扑友, 有機會再玩! ^_^

*************************

係扮醉既情況下…
我一啖錫落Sarah個咀度

佢個咀唇吾係特別柔軟..
但係, 就好似係細個個陣, 趁媽咪訓左覺,
靜靜雞偷食朱古力一樣, 充滿一陣陣既快感

"喂, 今晚有咩攪呀? 我個frd 有野搞喎,'
"哈 ? 係邊呀? 我識吾識架"
(女仔問得呢句, 即係有偈傾啦)

" 哦, 我都吾係好熟架炸..但係有個frd你都見過幾次架啦 "
(開始扮無知嘞我..騎騎騎)

"唔...甘呀...我睇完電視打俾你啦"
(等如睇下其他frd有冇局先算)

"頂, 你又放我飛機? 吳想見到我咪算囉.."
(大姐….你吾黎, 我去托呀 ?)

"咩呀..你講咩呀你...我都話打俾你囉"

好, 沖涼/換衫/噴香水/Jel頭/帶煙/着衫..出發

出到去, 見到老死Micky; 3男2女局; 經已飲緊
呢d情況..玩住等啦…
半個鐘後, 伊人施施然來到..
我即時精神百倍, 腦中預備既爛gag/笑位隨時起筷上菜

'十 !'
'五 !'
'五呀 !'
'十五呀, 中呀 !'

'醒少少啦吾該..吳係吳同你玩架 '
(我笑住串佢)

'挑 ! 一鋪就甘串呀 ? '
(佢吸左一啖煙, 預備噴射粗口)

'望咩呀望, 飲啦你.."
於是, 又再私片一陣

係我面前, 佢d三腳貓功夫好快又被擊到
'哈...你有冇花名架'
'做咩呀? '
"無..我見你飲親都may may, 我以為你以前叫阿may 炸"
'我頂你呀'
(伊人電眼一閃, 差d想攞個骰鐘車落我個咀度)
玩到2-3點, 悄現疲態
有d去左點歌, 有d去左隔離枱玩
有d去左嘈交
於是, 又係我同佢玩…
玩玩下, Sarah無端端訓左落梳化到 (有心定無意?)...
濫情而不濫交既我(!)係呢個時候, 覺得好似有1種好特別/好迷既感覺
" 咀佢啦 ! 咀佢啦 ! "
耳邊突然響起魔鬼鈴聲
於是, 我好自然甘攬住佢, 錫左落去; 再用條脷同佢溝通
佢又出奇地同我配合喎…
仲攪到我成身軟哂, 係得一度硬 !

我會打好呢份工..呀..吾係…
我會打好呢個輪 !

係男性天性賤格? 係男性天性吾可以只有一個情人?
定係..飲完酒…..聖人都守吾到寡 ?
(好彩我吾係個種 "怎麼天生不是女人")

我吳知, 答案留返清醒再諗...

(以上內容有真有假有多有少, 悉隨尊便
偷食前; 請交足戲並予以適當輔導)

By 數奇門二打六

孤癖員工

舊年三月份時由於有一位負責文職既同事離職關係, 其中一個team需要搵番一個替補, 而經過面試後, 最後主管F同肥龍喺多位應徵者中, 決定就其中兩位作出選擇.

姑且喺度用M同E黎交代兩位應徵者既身份.

M小姐: 外型端莊 (講真, 算幾靚), 談吐溫柔, 性格屬於樂意表達自己意見一類, 因此相信同其他人溝通問題唔大, 幾social對答亦算有聞路, 亦有做過marketing 及文職工作;

E小姐: 外型一般, 對答過程表現比較倔, 不過都算中point. 性格應該屬於比較孤癖一類, 似問一句答一句果種, 加埋一副廢話少講既樣子. 一直做開文職, 亦有做過 sales support 工作.

主管F覺得因為呢個職位工作需要日常同班老銷同工程師溝通, 所以表達能力比較重要. 如果太過孤癖或靜, 可能唔係幾好. 而且文職無咩特別, 只要有交帶同做得上心, 問題應該不大. 再加上主管F希望往後加強多啲marketing既力度, 咁M小姐對marketing 有認識可能減輕一部份工作. 所以佢會覺得M小姐比較合適.

肥龍既意見啱啱同主管F相反. 肥龍覺得始終呢個職位係文職, 而呢個職位最重要係可以將老銷同工程師既資料同要求, 好有效率並無誤咁記錄或者做成有關報告. 至於呢個職位點樣跟老銷同工程師溝通, 其實肥龍唔係好在意. 又由於肥龍需要呢啲記錄及報告作為對老銷既工作效率評估及跟進, 某程度上, 可以話呢個職位係肥龍既打手. 甚至於乎覺得呢個職位同老銷或工程師保持一啲距離未嘗唔係一件好事. 因為當老銷或工程師發覺唔係咁易巴結呢個同事, 反而可能乖乖咁交報告. 咁樣公事公辦, 喺效果上肥龍完全可以接受由一個性格比較孤癖既同事安安靜靜去做. 只不過唔知會唔會令擔當呢個職位既同事會視呢份差事為苦差啫.

往後既結果係, 因為呢個職位係喺主管F既team入面, 肥龍就交番個最後決定權俾主管F. 主管F亦一如所料揀咗M小姐. 不過M小姐只係做咗兩個月就已經走咗 (實際原因唔知, 大概話因為覺得做既工作同預期唔同). 又, 當接到M小姐既辭職信後立即再搵E小姐睇吓佢搵到工未, 比較好彩, 原來仲未搵到, 最終E小姐就開始喺主管F既team入面工作.

後來睇番, 雖然只係大約半年時間, 主管F大概滿意E小姐既工作質素及態度. 而主管F話E小姐雖然平日比較文靜, 不過其實亦會主動提供意見. 至於其他人, so far肥龍又無聽過有關對E小姐既特別意見囉.

咁最後可以算話係皆大歡喜.

呢幾日食咗咩? - 仙台行

呢次仙台行，除咗第一次遊雪山外，同之前外遊一樣就係到處搵食．

本身已經非常鍾意食日本菜既肥龍，呢幾日喺每日行程之後，最期待既就係跟住落黎既食物．

壽司、刺身、拉麵、烏東、蕎麥麵、日式咖哩飯等當然少不了．當中又發現有鯨魚及馬肉既壽司同刺身食，不過就唔敢試馬肉，最後只係挑選咗鯨魚壽司(雖然因為殺鯨原因並唔建議食)，而且肉質似生牛肉，味道只係一般．

參觀八幡宮松焚祭時，見到唔少地道小食(燒牛肉、燒肉串、燒帶子、燒響螺、燒餅、年糕等...)，覺得好特別又有過節氣氛. 而喺寒冷中品嘗甘酒，又別有一番味道．

不過肥龍本著「不時不食兼少食多餐」，有時只好見好就收，寧願晏少少肚餓再食．

其實宮城県本身最有名係牛舌及蠔(特別係每年12月至3月)，所以差不多每晚晚餐時亦食咗唔少．例如蠔，就試過食炸蠔 、生蠔 、蠔火鍋、麵豉原隻蠔咁食．雖然點整其實都係同一品種既蠔，不過唔同食法，食落都係津津有味呀．

另外, 晚餐時如加上一杯當地米酒或柚子酒一同品嚐，都係個唔錯既配搭.

除咗食物本身要求夠新鮮，肥龍最欣賞日本菜就係做型精緻又簡單，而又往往做到「不時不食」既原則．

最後，肥龍去日本鋪飲「鮮牛奶癮」，繼續發生．又原來蔵王牛奶，同之前及早餐時飲既，味道有些少唔同，不過都係咁滑．

咁，究竟呢幾日食咗咩? 不如睇相最實際.

www.flickr.com

為敗者喝采

當睇完Roger Federer 對Janko Tipsarevic既澳網第三圈賽事後鏡頭轉向Janko Tipsarevic時，喺電視機前既肥龍，實在衷心為呢位比賽既敗者拍手喝采．

可能好老土咁講，若單以兩位球手呢場表現計，要有一方要敗陣實在殘忍．不過比賽歸比賽，勝負亦在其中．賽前偏淡既Janko Tipsarevic，可能因為對住一哥Roger Federer 下，反而喺冇心理壓力，最後以強勁正手抽擊打出自己既風格．

講真，呢場四個多小時既比賽內，喺唔少關鍵時刻，真係替Roger Federer 擔心．不過，Janko Tipsarevic又實在打得好好．

每次Janko Tipsarevic打出如炮彈般但落點刁鑽既正手大斜線，眼見Roger Federer欲救無從時，真係要大拍手掌！有時，除咗欣賞球手表現，比賽就係要有激情．又因為咁，比賽先好睇，先至投入．

勁！

不過比賽中，除咗臨場表現，仲有經驗及時機．今次勝利屬於Roger Federer．

呢幾日去咗邊? － 仙台行

啱啱過去咗既13-17日，肥龍去咗仙台一趟．短短五日(減去仙台香港交通，實際三日)，行程唔算緊湊，不過所到所見，都係日本比較自然既一面．

首日早上到八幡宮參觀松焚祭，至第二日到松島沿岸船河一周、浸溫泉，及到伊達政宗歷史舘了解宮城県歷史,　到最後一日到蔵王睇樹冰．．．以及幾日既各式食物，有時間，一定再寫．

不過喺未寫之前，先放部份相片跟大家分享下．

去片!

www.flickr.com

跑手們請注意

正當大家興高采烈人人參加十公里、馬拉松時，整個賽事愈來愈似一個嘉年華．

不過賽事背後，大家可能忘記咗始終呢個係一個比賽．

挑戰自己表現自己又好，想贏比賽都好，不過可能我比較保守，途中最好唔會影響其他人呀．

曾經見過有跑手推住架BB車(內有BB)經過. 又試過喺西隧入面遇著一字排開既人群.

咁啱睇咗東京馬拉松網頁，見到以下通告，又講得幾到喎（第一/二點好搞笑）．


P.S.仲有啱啱一個月，我仲未收到參加通知書．打電話去又話已經確認，通知書快將寄出，有冇人同我一樣？

老遠留言

其實肥龍此刻打唔到中文, 不過只係剪剪貼貼, 辛辛苦苦, 先打完呢幾句.:)

希望呢張照片可以為大家帶來快樂及幸運!

see you all again very soon!

扑中HEROES

早排一直追開既外國劇集【HEROES】上星期啱啱播完第一季，對當中唔同角色既描寫及相互既關連，覺得特別吸引．忽發奇想，諗緊其實喺扑中可能留意到有啲近似既情況，即管試下寫．（如果寫得唔通可能係我既問題！）

正如劇中角色（或稱異能人）都有自己既特殊能力（時間停頓、時空轉移、飛天、不死身，預知未來，穿透物件等）一樣，咁每個扑及扑主都有其寫扑既理由及主題．有些扑寫時事，有些扑抒發感情，有些扑天馬行空創作大小故事，有些扑圖文並茂，又有些扑寫自己專業既範疇．每個扑用自己既形式內容，表達扑主平日所見所聞所思所感，各自精彩．而呢種能力，就係吸引其他人每日到訪既原因．

又由於留言或連結關係，扑主與扑主及扑主與訪客之間，可以產生出連聯繫，又再從文字及生活間產生互動關係，再後來形成「扑群」，blogroll．就如劇中角色隨著故事發展，與其他超能人相遇後，發現之間背後既宿命，繼而產生後來之間既關連及協同效應．咁有時每當見到個別扑主遇到一些不如意甚或逆境既情況時，就算實際上大家都幫唔到咩手，但就會寫下留言及分享自己既經驗及經歷，以表示支持及鼓勵．

另外，就如同劇中角色目標希望可以阻止預知既紐約市大爆炸一樣，每個扑主可以為抒發自己不為人知既一面而寫好，因為無聊而寫好，人寫佢又寫都好．正如鐵鎚兄所講「某個角落，總有某個人，就只為看你一眼」都好，相信每個扑都有其成立及持續去寫既理由．而又因為咁樣，大家先可以繼續有扑睇，又多咗可以見其他事既機會．

至於會唔會因為阻止咗大爆炸發生就係完結呢，咁同寫扑係咪可能有一個（或多個）原因／現象／情形令各扑主都唔再寫，我又真係冇諗過兼唔知道結果喎．

題外話：

如果現實真係有Sylar 同 Peter 呢個角色，可能都好有趣又令人好氣憤．

Sylar就如抄功課或盜版一樣，只要吸收咗其他異能人既腦袋後，就會擁有該種異能，可以話係弱肉強食，進化既一種．但Peter就係當喺同其他異能人共處時，可以唔需要殺人而其他人又可保留異能既情況下，隔空咁吸收異能人既能量及異能，然後擁有該種異能，係學習既一種．

雖然兩個結果一樣（最後擁有其他人既異能），不過方法就好唔同．

頭頂一片天空

幾年前，肥龍睇過一本雜誌，介紹一位專門拍攝天空既攝影師．介紹中畫面盡是藍天白雲，藍係清澈既藍，而雲既形狀無窮變化．雖然只係隨便睇其中幾幅作品，感覺很舒服，心情就平靜過來．

＊＊＊＊＊＊＊

友人曾經因為婚姻生活，弄得不愉快．

友人既丈夫，大男人得不得了．友人想做自己既事，不過因為怕丈夫唔鍾意，最後都係冇做．

記得當年肥龍都無理友人明唔明白，就話每個人頭頂都有一片天空，陰晴陽缺，對得住自己，甜酸苦辣，自己知道感受就可以．

而其他人，就唔好理會及干預他人既(私人)天空．

＊＊＊＊＊＊＊

曾經有一段時間，每當自己覺得唔開心，生活工作過得不順利不如意時，就會走到附近空曠既地方，搵過安靜無人既位置坐下．

抬頭望著頭頂一片既天空，好快就會進入寧靜既空間內，好快心情就會平復過來．

我欠缺咗嗰份Hea既感覺

之前提及過，啱啱過去既週末，肥龍就跟屋企人喺澳門渡過．對上一次到澳門，已經係一年多前【永利】剛開幕果時．今次再遊，發現又已經有好多新酒店落成　(雖然仲有好多新酒店興建緊)．咁肥龍又曾去過美國拉斯維加斯，想借呢度講下少少對興建中既澳門既感覺．

作為旅遊消閒娛樂區，硬件上可以話應有盡有．要幾靚有幾靚，要幾大就有幾大．簡簡單單一句就係「只怕你唔來!」．而且服務水準之上，無咩值得挑剔．同經營者目標唔同，可能兼肥龍並非目標顧客. 對於非賭客既肥龍黎講，依家澳門既吸引力，就算做咗咁多野，可能都仲只係一般，甚至乎只有飲飲食食，睇下華麗建築，到賭場見識既層面上．去一兩次就無咩所謂．但如果已經到過，喺新鮮感褪減後，短期內未必有興趣再去．

不過每次去都係來去匆匆，絕少逗留三天或以上．而如果想逗留更長時間，除咗賭之外，仲可以做咩呢?

跟之前到拉斯維加斯相比，澳門依家所欠缺既，就係喺華麗建築及賭場以外，其他既娛樂項目，例如大型歌劇、魔術演出、雜技表演等．記得多年前，肥龍到拉斯維加斯旅遊時，差不多每晚都會安排觀賞唔同類型表演，晚餐後可以輕鬆去欣賞演出．

另外，當到唔同酒店遊覽時，眼前見到都係到酒店參觀既、到賭場見識既人．每所酒店就變成人工景點一樣，不絕咁有旅行團到訪，非常熱鬧．相反，真正到澳門逗留較長時間渡假既人反而少．喺華麗建築入面，係五光十色既燈光，但就要等入夜後晚間走到街上看，先會比較有意思．而日間(如果天氣許可)，就會留喺酒店懶洋洋踢住拖周圍行，曬太陽及暢泳．記得當年肥龍就係日日嘈豬有覺好瞓，瞓醒就去樓下餐廳食buffet或者prime ribs．又或者去拉斯維加斯(呢樣唔關澳門事)，去參觀Hoover Dam同 Great Canyon又可以花上一整天．雖然澳門其實都有世界遺跡，只係就近及面積較小．又可能因為澳門就近香港，生活模式又跟香港接近，感覺分別唔大．

以上情形，或因兩地既氣氛唔同有所分別啦．但係，除咗好似大鄉里周圍見識外，去旅遊渡假果份Hea既感覺，或者只得兩日，肥龍一時tune唔切及感受唔到呀.

送野俾媽媽

事情係咁樣發生:

有日，路過糖水鋪，見到腐竹糖水，諗起龍媽，就寫咗篇「腐竹糖水」．

又有日，睇星島日報，見「每日一blog」呢個專欄．話歡迎投稿，就膽粗粗兼貪玩，逐抱住儘管一試心態寫個e喵附上心中一篇，就往附設既電郵地址寄．

無遂自薦唔係第一次，而且，唔試過又點知唔得呢?

＊＊＊＊＊＊＊

上星期四(一月三日)，收到報館通知，「腐竹糖水」一文，會於星期五(一月四日)刊登．

＊＊＊＊＊＊＊

呢篇刊登，時間上配合得不能再好．

一月五日，係龍媽既舊曆生日．一大家人早已決定今年跟年老既龍媽弄個生日慶祝活動．

湊巧，已移民外地既龍姊一家到香港過聖誕及新年．

已經好多年，未曾咁人齊做同一件事情．

結果經龍兄提議及安排，一行十幾人浩浩蕩蕩，到咗澳門渡過咗一個久違既「家庭日」週末．

期間空閒歎下午茶時，當其他人都行開咗買野時，得番肥龍同龍爸龍媽三個．

咁肥龍就攞咗張報紙出黎，俾龍媽睇．龍媽睇完第一句就講：「肥龍係邊個?」

然後笑笑口問肥龍：「你好耐未飲過腐竹糖水咩?」

讀一個興趣班

最近喺好幾個情況，分別跟唔同人提起興趣班呢個話題，再睇s-pig寫佢希望2008年可以take一個純粹為興趣既course, 覺得係一個幾好既想法．

其實自從大學畢業至今，肥龍所修讀既，大部份都係跟工作有關既科目．十年過去，得到既，就係事業上工作上既正回報．而待人接物及人際網絡上，又得到唔少幫助及提升．望落非常實際．

不過老實講，呢啲科目，除咗訓練獨立思考，主要用喺應付工作需要上．但就與自己既目標同興趣，可謂相差十萬九千里．另外有一兩樣興趣，因為工作環境及時間關係，真係好耐都冇再做過．想做又做唔到，其實都曾經唔開心過．

「究竟我想要啲咩野?」

其他人可以話肥龍得閒冇果樣諗果樣，不如做好份工先講啦. 不過最近，呢條問題、呢個想法真係愈來愈強烈．或者轉個角度諗，喺與工作冇衝突下，肥龍好想重拾以前既興趣，而且又未必安排唔到．又可能自己比較好奇，總喜歡尋根問底及想深入了解某些事物(跟工作冇關)．

咁，讀一個相關既興趣班，又或者認識一樣新事物，可以係一個滿足好奇及令自己refresh既一種過程．否則，肥龍只會見到一個愈來愈模糊既肥龍，而且愈行愈遠．

自己悶親自己．

紅盤問題

究竟咩叫係「紅盤低收」?

只係上網搵咗三份報紙，發現原來有兩份咁寫．

如果真係咁講意頭又介意寫「黑盤」呢個名詞，可以用「未能開出紅盤」吖．．．

好似依家咁寫法，真係怪怪地!

無奈失眠夜

勢估唔到，習慣瞬間進入睡眠狀態既我，2008年頭炮竟然先黎個失眠夜！

尋晚天黑黑凍凍地兩點幾睇完波諗住瞓落床後，竟然仲係眼光光!

側睡仰臥都已經出齊. 點知愈轉愈醒、愈急愈醒、又愈醒愈諗．．．結果就係繼續睜大對眼望住個天花．

最後無計可施，唯有再走出廳開電腦開電視係咁睇係咁睇，希望可以快啲瞓，不過最後都要睇到四點幾先至慢慢瞌著番．

苦、苦、苦...

一年願望

每年都有一月一日，對老銷黎講又係reset既日子．

就算舊年跑到識飛都係咁話，今日起，(都)係一個新開始．

前面好多障礙，又將有好多可預計及不可預計既變化．

如果一個小球代表一個(小)願望，可能太貪心，否則點止用上一年三百六十五天．

情願每個小球就表示一點能量，可以積少成多，化成一個大能量，令自己可以充滿力量去應付今年各樣挑戰．

另外，希望今年可以喺工作以外，可以抽多啲時間做好其中既幾件事情及重拾一項興趣．

最後，當然就係希望可以兩小時完成半馬拉松．