豬啲拗爐

肥龍鍾情豬啲拗爐 (GTR), 源於大約十年前住西貢時開始.

記得當年有一晚, 肥龍好似平常咁放工返屋企, 咁就喺所住既村口落車時, 喺同一刻, 肥龍耳邊傳黎隆隆既死氣喉聲響喺旁邊駛過, 正當八卦既肥龍抬頭想睇吓究竟係咩車咁勁時, 肥龍既眼前只係見到四盞圓車尾灯喺面前好快劃過, 然後見住呢架車直奔去菠蘿輋方向, 直至消失. 果四盞圓車尾灯好似彩帶咁喺路面舞動一樣, 令肥龍印象深刻. 咁喺果刻, 肥龍其實都仲未知呢架車係邊度出品同叫咩名, 只係由果時起心裡面幫佢改咗名叫做 “四盞圓灯”.

後來, 到模型鋪睇模型時, 無意中再見到“四盞圓灯”既模型, 先知原來呢架咁快既車就係日產(Nissan)既王牌車系Skyline GT-R. 但係, 果陣時都仲未知同識分邊架係R32, R33 同R34.

之後既肥龍, 就好似粉絲迷偶像咁, 不斷咁買同收埋咗唔少GTR既模型, 上鏈車, Q版車, 專輯特刊, DVD添. 公司枱頭其實都放咗兩部(1/64 Scale)既鐵製模型. 咁肥龍又係唔係只係鍾意GTR而對其他車望唔上眼呢? 咁又唔係喎. 其實靚車如靚人一樣, 一定會望多兩眼. 而且肥龍都有儲模型車既習慣, 只係講到最鍾意同到達粉絲程度喎, 就只有GTR R32一部. 講開儲車, 肥龍甚至曾經諗過, 有朝一日, 如果有鬆動錢, 肥龍真係想買架真既GTR返黎玩. 咁有得對住兼坐上去, 又可以得閒同架車打吓臘, 或者揸去兜吓風, 聽咗副引擎隆隆聲都唔錯噃. 不過真係講就易囉. 試問有幾多人可以好似大哥, 郭天王咁真係買真車黎儲吖(仲唔止一部), 發夢真係都未有咁早呀!

尾灯劃過夜空(From 頭文字D Fourth stage Opening)

Nissan Skyline 廣告 (日本)

狐假虎威

有時, 肥龍都覺得做老細真辛苦, 日理萬機兼要激勵一班已經滑哂牙既員工做(員工覺得)既「不可能任務」.

開會時你一句時佢又一句, 老細苦口婆心, 動之以情咁同同事們解釋項目要點.

奈何又有兩個思維比基層同事更基層既經理, 提出一啲搞亂檔既疑問時,老細都無咁好氣去答, 只係俾番個凌厲既眼神, 兩個好似被點咗穴咁立即收聲.

而肥龍, 就冷眼呢一幕.

發吓神經

如果有日去到NY Times Square, 神經質既肥龍一定會忍唔住爆番句: Yatta~~~~!!!

第三代人

作為書中所講既第三代(1966-1975年間), 講句真心話, 除咗細細本好快讀完, 肥龍睇完呢本《四代香港人》都覺得幾無奈同沉重.

書入面講咗好多有關四代香港人既價值觀同相互既影響, 投射及關連. 而好自然咁, 肥龍對第三代既描寫最為留意及有感覺. 特別係書中講到第三代之所以平庸, 就正正係人數上缺乏第一代(1946前或戰前)既量及力度上缺乏第二代(1946-1965年間)既勁. 咁, 睇到呢度就真係絕對不是味道. 心諗, 唔通真係所講咁差?

但當認真去諗究竟第三代如何可以突破平庸, 搵出出頭既方法, 又或者諗會喺邊一方面發展並成為其後既核心價值時, 一時間, 又確實諗唔出一啲實在既價值出黎喎.

不過如果再去諗, 肥龍就會覺得第三代比較明顯既就係適應能力及可塑性. 因為喺第三代既成長過程裡, 制度無時無刻喺度改變, 而且, 由取消中三淘汰試, 到A-Level至AS-Level, 由兩間大學(港大, 中大)到六間大學, 由英國管治到特區管治等, 好有愈來愈普及既情況, 精英呢個名詞已經開始慢慢淡化, 甚至消失. 喺呢啲轉變中, 有大有小, 有得益中亦又有照單全收. 結果, 當時好多決定, 除咗本身能力同環境之外, 亦要顧及呢啲轉變. 例如當年肥龍就係為咗趕及97年畢業早啲出黎搵工(當時97問題唔明朗), 結果放棄修讀碩士課程. 又或者因為肥龍係考最後一年A-Level關係, 咁最好就唔好repeat, 否則要面對新既syllabus. 到後來, 又因為有六間大學關係, 供應激增下, 大學生已經唔代表咩野. 咁如果本身適應能力唔夠強時, 自然比較吃虧. 相反, 所謂適應能力亦慢慢因此而培養出來.

咁又咁講, 精英唔精英其實對肥龍無咩影響, 更唔覺重要. 況且日子都係會咁過, 都係要靠自己努力同機遇先可以站得住腳. 不過又唔好講咩一蟹不如一蟹呢類說話, 試問, (主觀情況下)有邊個老鬼唔係咁講呢. 而且呢種講法, 肥龍覺得往往只係用自身標準去衡量其他人, 有無建設性, 不問可知.

另外喺硬件上, 除咗工作上所需要既技能同經驗, 第三代人面對科技既轉變(internet, 流動電話, email), 更上工作模式變化, 要將各方面融合, 可謂第三代人既共同話題.

如果第二代講成善於競爭, 善於制定制度既一代時, 咁第三代呢, 就應該會係善於鑽營制度既一群. 所以喺肥龍呢一代人中, 唔難發現身邊有唔少【飛黃騰達】, 【雍正皇朝】等節目既擁戴者. 而其中, 呢班人又特別對內裡既權術戰術鍾愛. 有人會諗, 第三代如果想得到第一/二代既青睞, 有時就要將自己從能力上至本能上塑造成合適形象, 再與其他人去競爭, 去生活. 而從觀察所得,第二代人中唔少有唔錯既執行力. 由於年齡及在職時間關係, 第二代人已開始負責擔當中層或領導既崗位, 而執行力往往就會係工作能力既分水嶺.

講到好似好負面. 不過, 肥龍覺得第三代絕非委屈求全, 不擇手段既一群. 而且可能因為生活既轉變, 工作上缺乏安全感, 第三代更懂得表達自己感受, 爭取自己想到既事物與生活模式, 亦愈來愈感性. 第三代人亦非常關注社會及責任, 更會身體力行. 因為第三代人(包括肥龍)相信, 不平則鳴, 有話要說既道理.

只係環境而言, 搵食愈來愈艱難.

自己一支

女角係平日好少飲汽水既人, 不過有時覺得真係天氣好熱, 好口渴, 就會想買支汽水飲. 但女角可能只係想飲少少, 又怕飲唔哂, 咁多數就會叫男角幫佢飲埋其餘部份, 而男角亦樂於咁, 一直都相安無事.

又到某一日, 天氣又係好熱, 女角又覺得好口渴, 正想買汽水時, 男角好認真咁同女角講:

「我想自己飲一支!」

**************

「你估你係小朋友呀? 自己一支....!」

運茶人形

肥龍喺 saintvenus叙情詩果邊見到呢個上鏈既運茶人形, 鍾意到不得了. 諗都唔駛諗, 今日立即走咗去四圍搵, 結果真係搵到兼買咗.

返到屋企拆開packing後, 實在唔可以唔讚嘆日本玩具既心思同功藝, 及把古物運用當今科技展現出來既能力. 除咗原設定(運茶人形)外, 隨書亦示範咗其他造型及情景, 總之一句: 「真係好得意同過癮呀!」

另外亦要讚呢本隨書, 圖文並茂咁介紹埋日本上鏈人型既歷史(200年前)同後來發展, 實在大開眼界. 雖然肥龍唔識日文, 但都睇得津津樂道.

講番個運茶人形模型, 除咗機械部份, 仲要去揾和紙去做衣服(模型唔包, 要另外自己買/做). 咁就要先去買咗和紙後 (但未諗好去買咩色, 有花定冇花, 又圖案定暗花...), 遲啲再砌好影相. ^^

持續改善

某日, 收到同事傳過黎既「改善報告」, 報告除咗描述事件經過, 喺"Corrective Action" 同 "Preventive Action" 兩欄上, 睇到以下既回覆(註: 絕無刪減, 唔好理英文):

「Corrective Action(s)」: Review "position", not to make mistake


「Preventive Action(s)」: Review "position", not to make mistake, in future


咁睇完之後, 真係想...

人地就呢

「頭先第二條好深好難答啊呵?」讀書時, 每逢考試, 肥龍身邊總會有一兩個同學好鍾意喺考完某一科目之後, 立刻走過黎同肥龍對答案, 又問你頭先果條點答. 而同學所期待既答案, 往往唔係想聽肥龍同佢講識答呢條果條, 反而係希望肥龍話同佢差不多情況又或者講只係識作答某幾條罷 (最好差過佢!), 覺得大家都唔識答, 咁佢就會好滿足咁離開.

勢估唔到, 離開中學十幾年後既今天, 肥龍喺工作上依然見到呢類行為, 更不時喺同事間出現.

例如, 每次肥龍把同行既報價(當然比肥龍公司出既價低)俾同事睇時, 同事既第一個反應往往唔係睇自己同同行報價內容既差別, 反而一開口就係話人亂報價, 好多野無報出黎又唔寫清楚兼落錯reference, 甚至有時仲話人地唔夠經驗做錯野添. 總之, 一句講哂, 唔係佢份報價問題. 做唔到, 只係人地唔跟規舉做野, 個價錢咁低, 佢都無能為力.

咁又當肥龍有時講開同行既動向及客戶既情況, 講起某同行/客戶出現咗問題時, 必定會有人走出黎馬後砲一餐. 然後佢就會話一早都講咗咁咁咁啦, 個客依家至知死, 如果一早搵肥龍公司做咪無問題啦. 彷彿, 好似係個客唔識貨, 又或者其他同行都比敝公司平庸, 俾唔到客要既野. 而且有時仲講同行都錯咯, 咁就算敝公司錯都唔係好大問題啫.

結果咁就真係大問題. 而事實上, 又係咪真係咁咩? 肥龍當然唔同意啦.

雖然同行市場佔有率可能比敝公司細少少 (或甚至更大), 又未細到睇唔到無威脅果隻. 又或者簡單講敝公司未到生意唔憂做, 等住慢慢做果種層次, 仲係粒粒皆辛苦, 唔做真係唔駛(再)做囉. 而且實際咁諗唔通喺同行工作既人, 個個都係揸流灘, 無經驗, 又不停犯錯既咩? 如果真係咁, 同行一早已經摺埋收擋咗啦. 況且, 敝公司其實有唔少人都係喺同行過檔黎做, 莫非佢地之前既問題黎咗呢處做就無哂呢咩? 係就咁神奇咧.

肥龍只想講阿Q還阿Q, 不過唔好變成藉口, 結果唔去認真思考, 改善同努力. 否則, 有問題, 唔識野果個, 可能係自己囉.

週六清晨

一如過往既週六清晨,

一步一步走, 到達淺水灣海灘.

天氣唔算熱, 八月天竟然涼風撲面.

抬頭望天空, 不見藍天白雲, 卻見滿天混濁, 就似鋪上一層薄霧.

走上巴士, 車廂內盡是坐滿啱啱游完早水回途既公公婆婆,

吱吱喳喳, 好不熱鬧.

肥龍坐喺一旁, 安靜咁細心閱讀今日經濟日報CK老闆既專訪.

就這麼近.

頭文精神

講起「最佳位置」同漫畫, 自然令肥龍諗起【頭文字D】. 喺【頭文字D】入面, 未知原作者係咪話中有話(定又係肥龍諗多咗),除咗漂移外, 有兩個概念, 肥龍特別感興趣亦十分受落. 第一個概念就係用車之道(升級)同第二既最佳路線. 相信好多讀者包括肥龍, 喺未睇過【頭文字D】之前, 真係連有架車叫AE86都未知. 又如果將車比喻成人, 咁AE86既外表就可以叫做其貌不揚既人. 起碼, 當一眾已經揸緊GTR, RX-7, Type-R既車手不屑一顧, 甚至笑呢架係古董, 估佢跑唔郁添.

**********************

用車之道(升級)

但又有無人估到, 原來喺平凡及陳舊既外殼內, 竟然係放咗副賽車級既引擎呢? 而且其實喺未安裝呢副引擎前, 拓海所駕駛既AE86每次勝出其實係靠tune車既成果及駕駛者(拓海)既技術加埋對路面既熟悉既結果. 不過漫畫中更指出每架車都有極限, tune車只可以配合駕駛者既風格(即人控制車), 但唔可以令駕駛者力量更大(即車惡過人). 喺極限未出現之前, 無必要無謂咁去有(再)升級甚至換車. 更覺得用車最高境界就係可以tune好及平衡好, 令一部車性能上既優點可以表現出黎.

咁喺工作上, 大家又有無見過某啲其貌不揚既人, 合作落先發現原來係好鬼勁同能幹呢? 無錯, 人靠衣妝, 邊個唔想又叻, 又聰明兼靚仔? 而且就算有哂咧, 又係咪你呢? 咁如果無是但一樣, 咁又點呢? 肥龍就真係見過有人真係好認真去裝備自己(tune車)同了解所做工作(熟悉路面情況). 不過就見到更多人只係怨天尤人, 又話呢樣果樣, 總之唔關佢事. 又有人只係著眼自己做大公司同細公司, 覺得大公司有限度, 資源多, 支援足夠, 總會發揮得好啲. 但細公司呢? 咩都要自己落手落腳, 要親力親為, 咪搞.

肥龍覺得就算喺大公司做得叻, 喺細公司做又未必搞得掂. 有時甚至覺得喺細公司打工, 因為支援少, 但空間大, 可能工作能力要求比大公司更高. 只不過, 喺大公司做, 除咗要有能力之外, 仲要識用手腕囉.

另外喺嗜好活動上面, 例如攝影, 打球, 肥龍亦見好多人一味買最好既裝備, 又補品又呢樣果樣, 不過如果問(或睇)本身技術咩? 就真係要睇過先知.

所以, 有好多野, 有時間真係要好好tune 吓自己.

******************

最佳路線

而一直以來, 肥龍對「最佳路線」既理解就係任何賽道必定有一條最好(optimal)既路線, 而駕駛者只要跟住呢條路線走, 配合應有技術, 自然可以跑出最佳時間. 但前題係所有車既性能係一樣.

但喺第四輯入面, 劇情終於對「最佳路線」有一個幾完滿既解釋. 原本基本上對同一條路線, 每一部車都會有自己既最佳路線. 而所謂最佳路線係相對, 而唔係絕對既(簡單講就如A車正常比B車快, 咁喺行同一條路線上, A 車一定比B車快). 所以真正既最佳路線就係A車用自己既極限, 配合應跑既路線, 跑出最佳時間.

咁套入番工作上, 「最佳路線」就等同上次講既「最佳位置」. 咁就算同一個工作崗位, 基於每個人既能力, 經驗下, 手法不盡相同, 又各師各法, 何謂「最佳」, 真係無人可以話到俾你知. 而且通常呢啲所謂經驗, 好難可以三言兩語講得明, 又或者對方可以一時間吸收到.

肥龍就不時會俾同事問點樣先可以做個老銷.通常肥龍就會叫同事睇肥龍做一(幾)次, 留心重點, 加埋自己一啲能力同經驗, 再加努力, 觀察力, 睇多啲問多啲, 嘗試去搵出自己既方法. 肥龍果套只係參考, 千祈唔好照跟, 因為可能會害死佢, 後果自負. 再叻啲既, 見到肥龍既缺點就唔好再學(不過唔駛話俾肥龍知, 因為肥龍小氣). 況且因為物以類聚關係, 肥龍覺得每個人都有潛質做老銷. 但好同差既老銷既分別係, 好既老銷可以有幾個(多個)面具及經驗, 迎合唔同客戶需求及模式. 而差既老銷可能只得一種方法, 或只可以對同一類人. 不過如果性格怕同人溝通或表達能力有問題, 又係另一回事.

咁肥龍諗同事應該因應自己既資質, 加埋能力同經驗,去搵出自己最自然及最有效率既手法, 可能仲實際. 唔係講笑, 其實肥龍既「最佳位置」自己都未知!

七十對一

漫畫【浪客行】入面, 宮本武藏走到京都踢吉岡家道場, 先後擊敗當家既吉岡清十郎及吉岡傳七郎. 吉岡道場裡頭上下對此深深不忿, 決定喺宮本武藏離開京城既路途上, 拉埋一大班人, 設下埋伏, 誓要致宮本武藏於死地.

呢班人, 總共七十人, 分佈喺路途中既山頭, 準備就緒. 可惜陰差陽錯, 呢個形勢, 早已經有人向宮本武藏通風報信. 宮本武藏聽到後, 思量如何面對呢個逆境, 係逃走, 定係面對? 如果係面對, 又點去面對?

一對七十, 七十對一定七十次一對一? 然後逐個擊破?

***********************

肥龍睇呢段時感受甚深, 唔係因為打打殺殺, 係宮本武藏對面前事情既思考過程同推斷.

其實每日眼前既工作, 問題, 事件, 第一眼或初接觸時睇落好麻煩, 唔想做. 但又有無試過諗可唔可以將件事細分, 逐個逐個去做去處理呢.

莫講話七十個問題一齊同時出現, 就算係七個問題. 可能已經搞到嗌哂救命, 疲於奔命. 不過一個一個做, 或者有得諗.

又如果唔係面前逆境, 唔似宮本武藏呢類生死有關既處境, 換轉係喺生活裡面, 可唔可以將大目標轉化為小目標, 唔同時間完成唔同目標呢?

記得之前肥龍有個同事, 好進取, 成日問肥龍邊度(指工作)先係佢既最佳位置. 肥龍當時就同佢講佢只係做咗兩三年野, 又係新入呢行, 就叫佢俾啲時間慢慢學, 一樣一樣去做, 打好啲基本功. 而且話得係基本功, 就係要次次, 就算唔同環境, 都要交到野既能力, 唔係撞彩一砲, 無下次咁囉. 有啲技巧, 真係一年浸兩三個都唔嫌多. 但呢個同事就係心急(肥龍甚至覺得係有啲貪心), 喺(未)做落一啲項目後, 連結果都未出 (況且好大機會會做到), 就已經叫肥龍俾新野佢去做. 咁肥龍又諗點解唔等吓, 再睇有咩可以做好啲同改善呢? 其實肥龍可能更想佢快啲上手, 幫手做野啦! 而且唔好話佢, 講真, 肥龍甚至連自己既最佳位置都唔知啦.

而且有人羨慕其他人既成果, 但佢又可能唔知人地每日付出(小)努力, 一步一步黎, 先可以做到或得到依家既結果.

至於生活例子更多的是. 好似寫扑, 原來唔覺唔覺肥龍已經寫咗一年(舊年八月). 如果一開始話我會寫扑同繼續寫, 肥龍自己都唔信呀.

最後, 講番呢個同事, 佢做咗大約一年就走咗, 理由係去搵佢既機會同「最佳位置」.又結果喺之後既一年, 佢再轉工, 仲要係三份添.

問心果句

肥男角兩手各攞住一杯mocha咖啡, 走到女朋友面前, 懶醒、懶細心咁問女主角要邊杯.

「一杯多cream, 一杯少cream, 你要邊杯?」

********************

女朋友可能會話:

「做咩去買野飲唔講聲?」

「車, 我都唔飲咖啡嘅, 你唔知既咩?」

「唉, 肥死你呀, 仲飲? 等我飲杯多cream咧. 你呀下次唔好....咁咁啦!」

********************

肥男角可能心諗:

「最好兩杯都俾我飲哂就正咧!」

生活體驗

畫面係一間日式拉麵店內, 經理(定老板娘呢?)正喺度炳緊(應該)新黎既侍應. 而呢個侍應應該係二十出頭.

「我有冇教你點裝飯? 有冇? 之前我點講? 都話咗......%#$&*!!」

正喺度食緊麵既肥龍, 心諗: 「裝飯咋喎, 都要人教? 唔係呀嘛....唔通屋企有工人未裝過飯?」

******************

又畫面轉到一間銀行入面, 客户主任Leo正為面前既(肥)客户介紹服務詳情, 更新安排事宜. 從外表睇, Leo應該係畢業出黎做咗幾年野, 廿零歲果種熱血青年.

「肥龍先生, 咦你星期六唔駛返工呀? 」

「咁好既? 呀睇你既装束(肥龍著住運動衫)你應該都鍾意運動喎, 你有冇睇波架? 今晚英超開咧......我呢.....」

就係咁, Leo 一路同肥龍講, 一路幫肥龍填表格. 期間, 肥龍見咁大叠表格, Leo又真幾好心機幫肥龍填喎...

又講真, 除咗介紹產品清楚外, 又冇填錯野下, Leo又幾好傾喎, 特別係講波果陣時.

******************

畫面再轉到肥龍屋企. 「叮噹!」打開門見到既係送pizza黎既送遞員. 咁啱, 又係二十出頭既年青人喎.

送上pizza, 退回找續時, 年青人微微笑同肥龍講咗句說話.

「先生, 多謝哂, 希望你地食得開心啲, 下次再幫襯我地(公司名)吖, 拜拜!」

而肥龍又真係覺得佢係發之內心去講, 咁肥龍亦報以微笑同佢講聲拜拜.

*****************

講咗咁耐, 肥龍其實想講, 装飯好, 同客吹水又好,同客微笑講野都好, 有好多野相信唔係單靠有冇在職訓練, 有冇工作手冊/ 程序可以做到, 更唔好講做得好唔好. 有啲野係靠發自內心同上唔上心上面.

肥龍平時做老銷, 到自己做番客, 真係好想見番啲人性(Human)啲既野, 並唔想要千篇一律既一號笑客, 二號對答咁. 但諗如果要做到咁, 對方可唔可以俾到呢個感覺, 就真係要靠對方平時既生活體驗. 例如有冇多留意身邊事, 見得多, 聽得多, 又諗多啲.

況且太陽底下無新事, 唔識唔知咪開口問囉, 咁可以慳番唔少時間去揾料同去學習.

另外就真係要嘗試去接受份工. 不過就唔知點解, 可能真係做果行厭果行, 好多人做得耐熱情過咗高峯, 又好似滑哂牙咁, 無厘生氣 (肥龍亦係其一).

有機會, 有工做就應該去發揮啦. 而且咁樣諗, 做野應該會開心啲啩.

意外休假

突如其來既八號風球, 做就半天閒情及步伐放慢.

下晝兩點幾, 收到人事部宣佈, 八號風球放工. 做埋幾個電郵, 攞起背包就走.

明知地鐵多人, 唔想迫, 唔想被風吹, 唔想被雨淋. 轉去附近巴士總站坐巴士.

原來四十五分鐘既車程, 因為種種原因, 變成一個半小時既路程. 反正唔趕時間, 無所謂. 出奇地喺呢一個半小時既路程中, 睇完份信報, 玩咗陣Mario Kart,仲瞌咗半個小時.

意想唔到既自在. 只差在欠一杯香濃熱咖啡.

踏入家門, 啱啱五點正. 有啲肚餓, 喺雪櫃攞咗份之前買落既日式黑豚燒賣. 隔水蒸約四分鐘就有得食. (黑)豬肉味香, 味道可以話隨時好食過某某茶樓水準. 嗯, 一於下次再買黎食.^^

堅記車房

唔知有幾多人記得或知道電影【英雄本色】入面有間由堅叔(曾江飾) 開辦既「堅記車房」. 近日, 肥龍發現自己既部門愈來愈有「堅記車房」既味道, 至少老細俾肥龍既感覺就真係咁.

呢個情形, 同job rotation 無關, 又肥龍唔係有咩ad hoc 項目要搵人做. 不過, 當一方面肥龍因為工作性質, 工作量去調節部門人手, 而慢慢建立本身團隊時, 另一方面,老細就會耐唔耐搵肥龍傾話佢想放邊個邊個想入肥龍果team一陣 (通常只會短暫逗留3 至6個月左右), 又或者因為某啲肥龍都未必知既原因 (兼問老細都未必肯講, 例如老細想放呢個headcount落肥龍度), 就會問肥龍有無興趣接收某位同事, 更甚係未問已經塞咗個同事入肥龍team之後, 然後老細又會另有打算.

結果, 除咗老銷, 有時肥龍又充當內部培訓師, 職責係喺短時間內用任何辦法，一下子咁把公司精華及客戶情況塞俾呢位同事, 務求同事之後可以快快獨立應付工作.　

當新同事加入一刻, 雖然喺人手上係充裕咗, 做某啲事會方便咗 (特別係要人多既場合). 不過開始時, 其實肥龍都幾抗拒呢個情況. 因為除咗咁會影響本身團隊既計劃外, 人事上又可能帶來諸多不便, 甚至係現有成員會產生不必要既猜疑或誤會. 而且新成員落場前, 需要俾briefing, training佢 (雖然依家已經好好因為已經有同事幫肥龍手做), 更要安排佢同啲現有成員出一齊去見客. 而一般呢個過程, 大概都要4-6個星期時間, 咁有時又真係做到新成員啱啱上手時又要準備走.

但係諗深一層, 除咗公司及產品知識外, 做呢啲野,老細可能係想俾新加入既同事了解吓(部份)客戶既需要及感受吓客戶既直接反應, 等到第日佢地返到真正既崗位時仲會識得對客戶既扣招數同技巧. 咁換轉, 到同真正老銷既同事都又會有多啲共通點及狀況.

不過咁, 寫到呢度, 肥龍諗不如真係諗定啲ad hoc項目出黎迎合呢個情況, 一於物盡其用, 因利成便咧. 因為真係有好多野(未)做呀!

本區遊客

有次諗如果唔係因為做老銷耐唔耐要帶啲外國客或同事四處逛, 其實喺香港有好多地方, 其實肥龍都未去過.

迪迪尼啦, 360纜車啦, 黃大仙啦,...仲有好多好多地方, 唔好話去過, 甚至有啲連咩名既都未必知.

咁搵啲藉口啦: 做野忙無時間, 放工已經好晏, 天氣好熱, 個度好鬼遠喎... 個度無車好難去架!... 好多人去又迫唔好預我呀!... 有排排隊個喎...

今日睇電視, 正如主持所講, 香港人就係少咗份閒情逸緻, 太計算又太匆忙, 唔會咁有心搵個時間同地方hea.

另外, 莫講係香港, 就算係肥龍由細住到大既南區, 都有唔少地方未曾去過. 除咗屋企附近地方外, 平日好多地方只會係坐車時路過, 或者放工已經入黑, 根本就未去過或咩都睇唔到.

近日肥龍咁啱因為要幫喺外國既家人買咗支鏡頭, 咁喺送去之前, 貪得意, 就走咗去問老友借埋部相機. 然後一身輕裝, 化做成本區遊客, 嘗試用雙腿行走, 帶住相機試鏡為名, 到咗幾處南區地方拍攝. (本來今朝晨早想去薄扶林影相, 但因為落雨作罷.)

熱就係熱啲, 不過風景的確係唔錯. 而且望住個景, 有時有陣海風飄來, 其實都幾寫意同舒服.

攪笑既係當肥龍走到香港仔避風塘時, 船家見肥龍一身拍友裝扮, 當肥龍係遊客, 竟然問肥龍有無興趣租船出海影相, 又不斷向肥龍推銷避風塘美麗景色. 最後肥龍當然無租啦, 不過就諗或者下次咧. 不過肥龍屋企距離當時所處地方只不過係步行五分鐘路程.

試鏡成績如下 (我不嬲用開傻瓜機, 咁所以其實好水皮架咋, 失覺哂!):

擦身而過

如果平日唔係要趕住返工 (實情係起唔到身! @_@), 肥龍必定想抽時間朝早跑完步後先返工. 而且, 一早跑步好處多, 除咗喺持續既酷熱天氣警告下, 朝早氣溫無咁熱, 可以跑得舒服啲之外, 跑完後仲可以嘆番隻糯米雞,飲番杯茶做早餐添. ^^

上個週末好多活動, 攪到周身攰兼作病, 只可短休一次. 一週過後, 今朝一覺醒來, 立刻起身換衫, 衝落街向淺水灣出發. 而肥龍為咗可以有效了解自己既(分段)時間及狀態, 喺幾個星期之前, 肥龍開始記錄有關跑步資料, 向四十分鐘內(第一個目標)進發. 而最近五次成績如下: (只係個人時間, 無話快定慢!)



就算唔係因為準備渣打馬拉松, 肥龍都係非常鍾意跑步呢個活動. 除咗因為鍾意運動, 可以出一身汗外, 其實肥龍更享受當中既過程. 而喺呢個過程入面, 跑得唔好, 狀態唔好時, 彷彿成日有兩個自己互相對話(一個好似魔鬼叫你停, 一個天使叫你繼續唔好咁易放棄). 到跑得唔錯, 狀態幾好, 開始沾沾自喜時, 又會有個"mini me"同自己講: 「喂, 老友, 今日跑得唔錯喎!」 跟住就會博盡最尾一程, 全速向終點狂奔. 而跑完又會自言自語心中同自己講: 「我, 其實仲可以跑快啲架!」

兩個我時既我:


沾沾自喜時既我:

身份對調

尋日同事SB氣沖沖走埋肥龍前面, 一口氣講咗佢對依家公司某個制度非常不滿、失望後, 欲立刻起身拂袖而去.

肥龍問: 「做咩起身呀?」

SB 答: 「我講完咧.」欲再起身而去.

肥龍立刻收起平時從容既面口講: 「我未講喎. 而且我覺得你咁樣好唔尊重我喎! 你既然行得入黎有說話同我講, 就應該聽埋我既回應先走. 否則, 你想同我表達咩訊息呢?」

肥龍喺呢度唔係想講SB如何唔啱, 如何唔識俾面肥龍, , 如何唔咩等負面評論. 更唔係想大家認同肥龍既對或錯. 亦唔係要SB向肥龍認錯, 講對唔住. 喺度, 只係想分享吓自己既睇法.

觀點與角度, 唔同又何妨呢? 反而只係想講如果每個人都可以換過角度, 試吓身份對調, 可能有好多事其實都可以商擬, 更多空間可以傾, 更有餘地去討論.
(雖然話唔講件事, 不過都係講少少…)

- SB覺得舊制度唔得, 結果同事士氣低落. 肥龍完全知道及同意, 所以年初已經著手開始同樓上老細提議, 討論.

- SB覺得如果年初傾到依家都未傾掂, 不如早講唔得就仲好. 肥龍覺得如果件事係重要, 就應該繼續爭取, 繼續討論, 直至有一個答案為止, 唔應該咁易放棄.

- SB覺得樓上老細傾到依家都未肯落實, 有啲拖延既味道. 肥龍只可以話決定權始終喺樓上老細手中, 一日佢唔同意, 一日都唔可以落實. 期間, 都係果句: 要繼續俾壓力樓上老細(唔同形式, 軟硬兼施)!

- SB覺得如果需要更激進先可以令樓上老細意識到問題既嚴重性, 佢願意去做. 肥龍覺得咁做其實幫唔到啲咩, 而且只會係後繼者得益. 況且樓上老細又點會咁易就範呢? 到時露咗底咪仲被動? 而且難聽啲講, 有時真係唔好睇到自己對公司好重要, 真係死路一條. 又肥龍講如果要做烈士, 不如就夠膽做完成件事攪掂先唔做, 仲有型, 唔係似依家咁一走了之咁消極囉.

咁SB衝入黎既目的, 想要咩野, 肥龍心裡有數. 某程度講, 佢都係想件事好及講出感受, 只係大家身份唔同, 手法唔同啫. 不過成件事最令肥龍唔開心既就係肥龍同SB之間既信任關係因為呢件事已經響起紅燈, 或者已經蕩然無存.

由尋晚到依家, 忽然諗起好多呢幾年間同SB共事既畫面, 徘徊喺二三線之間, 肥龍有個決定.