貳零零陸

仲有十多分鐘,貳零零陸年就成為歷史.

肥龍希望...

世界和平,環境污染未再惡化而有所改善,

香港經濟愈來愈好,但揾到錢既仲記得幫助老弱傷殘,

望大家有更好及稱心既貳零零柒年!

估你唔到

肥龍講歷史科係ABC,有限公司,提起忌才,講多個都冇,就只係識得講楊修.

楊修之死因,主要係因為佢懶醒咁去猜佢老細(曹操)既諗法,而又真係猜中,再加上身邊人既金手指,引黎曹操既妒忌,結果反被其聰明所害,招致殺生之禍.

而喺日常工作裡面,事實上肥龍又真係過著唔少要你做佢肚裡條蟲既老細及客户.

有啲老細/客户凡事鋪張,講排場擺大款,聲大大,凡事就好似只有佢老哥先至識,先至諗到.遇着呢類人都幾惡攪.

因為若果閣下諗住謙虛啲,扮吓無知唔識既話,必定俾呢類人寸到阿媽都唔認得,然後仲質疑你做咗呢行幾耐,連呢啲野都唔知有冇攪錯等.

但相反,如果閣下夠吉士有本事直接講佢既想法時, 佢又可能出於面子或者要表現出自己既優越性,偏偏會講出另一個答案及意見,等你要再花功夫及時間去同佢磨,然後再磨番去原來個答案.

於是好多時肥龍喺見客前就要諗定幾個Plans, 一於Plan A, Plan B, Plan C....全都度齊,實有一個扑中. 而且就算撞正比個客寸, 都有兩手準備去走位及解畫,冇咁易俾個客"將"死.

始終肥龍係想個客"買"個建議或方案,唔駛要抝羸佢.

講到呢度,肥龍忽然諗起周星馳既食神既其中一句對白--- "俾你估到我仲叫食神？！"

楊修之死

上次講開最佳員工, 講到身邊有隻弗馬時,做老細既當然值得高興. 但同時亦衍生出一個老生常談既話題--忌才.

有朋友問肥龍唔驚有一日俾呢類"明日之星"所取代咩?

講真句,肥龍真係唔驚,仲唔介意噃.

楊修既故事好多人都聽過,甚至(以為自己)中過. 作為老細,試問有邊位唔想有位話頭醒尾,辦事能力高既呢? 除非嗰位老細係靠關係、擦鞋上位,否則以肥龍所見及觀察,大部份老細(真係出錢果種)同憑辦事能力上位既老細,大多數都無話特別忌才,相反偏心既就見有唔少.

問題係反而好多時呢啲老細不時會喺身邊聽到一啲旁觀者(簡稱小人)唔停咁打小報告,篤背脊及講啲功高蓋主、食碗面反碗底等閒話.

人心肉(慾)造,當聽到類似既野不停咁由各方面唔同人講時,潛移默化或者意志力及當信心有啲唔夠堅定時,呢啲說話就好易入哂腦. 再加上疑心驅使,好自然就不自覺咁就對目標人士(如公司"明日之星")作出一啲對實際生產力無益既辦公室政治甚至係啲"損人不利己"既手段.

以肥龍所見,以上情況,普遍喺擔當個別功能(Functional)或營運(operational)既階層比較常見.可能因為以成本計,如果有人知道喺工作能力上差不多但反而人工及職位比自己既多好多既情況下,果份安全感,可能內心真係感到莫大威脅,所以有呢類思想,亦可以理解.

但係工作上要兼顧既環節有好多,除非玩辦公室政治係主要工作, 否則真係得閒都諗第樣啦.仲有如果做野忌呢樣忌果樣,驚得幾多?

另外,老套啲講謂"長江後浪推前浪",有時做老細既亦要明白工作既性質同要求經常咁變化、增加及被取代,如果自身死守一套又唔提升本身能力,被淘汰都無可口非.

相比起"教識徒弟無師傅",肥龍比較相信"飲水思源"果套. 而且既然肥龍有能力去教育及指導同事,分享經驗,自然比同事喺呢個範疇所掌握更多. 到同事有所得時,肥龍既能力及經驗可能又到另一個階段啦. 始終,每個人喺公司既定位要有獨特性及策略功能.

至於出錢果種老細,有容乃大. 比起忌才,可能佢地驚有日有條帶哂啲客或者其他同事走,另起爐灶,甚至係倒戈相向,果時仲大鑊!

天朗氣清

努力咗成年,終於有機會放個長假休息一下.

近日天氣非常正斗,可謂天朗氣清,風和日麗.

可能因為空氣污染,真係好耐無見過個天咁藍同四野無雲.

而氣温亦都好適中,唔覺凍亦唔覺熱,最宜户外活動.

於是肥龍今朝帶住部儍瓜數碼相機落街,喺附近各處呢度拍吓,果度拍吓,儲定多啲相再遲啲噏撈上個南區扑.

聽日再跑步去淺水灣,唔好嘥咗咁好既天氣.

最佳員工

今年Annual Dinner,肥龍其中一位同事獲得最佳員工獎(共三位).

作為同事既老細,當然感到高興同欣慰.開心主要係因為呢位同事既能力同努力得到管理層所認同及嘉許,而肥龍亦揾到一位工作上既好幫手及可造之材.

至於呢位同事點解或點樣獲得呢個獎,肥龍喺度不贅.而且通常可以得獎既元素都係幾類似而且都幾common sense, 關鍵既反而係作為員工既係咪有心同盡力去做好其崗位既職責及工作. 就好似大家都知早睡早起精神好,但現實有幾多人做到又係另一件事一樣.

肥龍想講既反而係另一位同事(同事K)對呢個獎既睇法.

同事K問肥龍,獲獎既同事會唔會因為得咗個獎後反而令其以後既工作壓力增加? 言下之意,同事K覺得獲獎既同事會不自覺咁會在意以後既工作上既得與失, 又或者會對自我要求提升. 另一方面,可能因為呢次得獎,其他同事對該同事既期望亦自然有所提高.

其實肥龍對同事K既睇法都幾明白,但又不盡認同.

有時諗...如果獲獎既肥龍,情況會係點呢? 但事實上,肥龍做每個項目或工作時, 講真真係冇乜野諗. 如果係諗既,都係諗點樣快啲做完或者死完件事. 至於係工作上既得與失,又或者係公司邊個邊個點諗,(果刻)真係冇諗喎....

而且有時間諗不如做第(多)件事或寧願早啲收工休息仲好啦.

就係咁,如果喺一段時間後(如三個月,六個月等)再睇番,可能肥龍已經做埋做埋唔少項目同工作.

當然,之後都會計番條數,檢討得失. 失既當然需耍要諗多啲、耐啲,因為要解定畫或者要諗定Plan B嘛.

反正做野唔係"做到"就係"做唔到", 50/50! 重要係明白錯誤,學習錯誤,累積經驗.

至於壓力,又點會無呢? 分別既只有可以控制或唔可以控制.

當然就算做哂所有野,冇獎都無所謂.而且,做好/啱野係份內事."最佳員工獎"呢啲野,可能只係大/中型企業專有既人事管理工具. 講實際就遠遠唔及小企老細醒你多幾個月花紅!

另肥龍2006年既工作上基本上已收爐,謹祝各位聖誕快樂,新年進步!

整大個餅

以前,肥龍讀書時讀有關企業"願景"既文章時, 基本上覺得係吹水為主,接近大龍鳳既口號形式既說話罷.

而且每日肥龍及同事喺工作上方就係面對不同既競爭.

好多時最後都係落入既有範圍上(價錢、完成日期)與客户角力,結果就算攞到單亦賺少好多(因為同行真係Cut price得好盡). 而喺同時間,喺不同形式既服務上,除咗客户方面既角力,其實肥龍既公司亦好似好多香港公司一樣,一直被國內同業所競爭、進逼,甚至取替. 正宗腹背受敵.

但最近讀任天堂社長岩田聰先生喺E3發表Wii既演說後(廢業青年日記),深感對"願景"呢個管理名詞有莫大既體會. 而當中所講既願景, 其實套喺肥龍所處既銷售工作裡面,可以謂一矢中的.整個演說,說明咗Think out of box, 對症下藥既策略性. 更重要係講如何整大個餅(市場),而唔係去講要食個餅幾多.

以下係一啲肥龍覺得值得提出有關任天堂願景既翻譯節錄:

"「任天堂的新目標是整體遊戲人口的擴大」，以及由此引申的「增加家庭中與遊戲有關聯的人」等今後的願景。"

"既然決定要往增加遊戲人口的方向走，那麼必須從以往沒有任何人嘗試過的領域開始來做。"

"破壞遊戲的「至今為止」: 一直做著同樣的事情，有一天一定會走到死胡同。比方說舊有路線的延長之類。"

"Wii的遊戲像是網球、棒球與高爾夫等等，具有讓不打電動的人也能感覺「這個我也會」的力量。"

"在不玩遊戲的人當中，包括了不感興趣的以及甚至對遊戲抱持著敵意的人。為了改變這個現狀我們做了不少嘗試錯誤的事情。只要能將這種狀況加以改變，那麼不但能擴大市場，電玩遊戲的社會地位也會隨之提升。"

"透過Wii這項商品，將能夠讓那些至今為止不會被稱為遊戲的東西，變成遊戲。我們想用這樣的方法，讓人們感到驚奇。因為我們是靠讓人驚奇來做生意的啊。"

"現在所謂的次世代，就是根據遊戲進步至此的方向，增加發色數、2D成為3D、把3D變得更漂亮、然後更精細美麗的3D...。是走在這樣的路線上。但是，這樣由以往到現在的延長線，並沒辦法增加任何遊戲人口。"

"次世代遊戲機戰爭、或者是如何在競爭中勝出，為此要如何妨礙對手之類的事情，要是有考慮這種多餘的事情的閒暇的話，還不如去思考如何讓消費者感到驚奇。任天堂在做的就是這種感覺的事情。"

"任天堂的終極目標，是讓世界上儘可能多的人臉上充滿笑容。因為我們是創造笑容的企業。"

__________________________

題外話:
從玩任天堂紅白機到依家SONY既PS2既經驗,加上對NDS既信心一票,作為遊戲機迷,真係非常好奇想知道另一種玩遊戲機體驗係點.再聽埋岩田社長一番"解說",肥龍仲需要考慮咩呢?

Google 萬歲

唔寫個"服"字俾Google都唔得.

如果唔係有佢,可能依家仲係用緊2M既電郵服務,繼續俾ISPs揾錢.

另外就係佢有一個免費軟件叫 Google Earth, 功能真係勁到嚇死人, 除咗可以瞬間看地球外, 仲有好多功能可以令一路用開"地圖王"或"中原地圖"既肥龍發現原來地圖可以咁好玩, 咁過癮!

肥龍甚至可以用佢黎畫出平日練習跑步既路線及計算出全程距離....

而且,因為與網上連接,非常互動,功能亦不時更新!

或者係時候(雖然遲咗好多)諗吓要買番一兩股Google支持一下啦~~

心平氣和

近日肥龍公私兩邊忙,心情煩燥. 好多野都缺少咗耐性,尤其係對同事方面.

不過話分兩頭,雖然肥龍亦非無的放矢,但就錯在說話措詞比較正接及毫不收飾,愈講愈烈,言談間可能傷害咗同事亦唔知.

而其實肥龍都知同事心裡絕不好受.可能只係礙於肥龍身份關係又或者怕再俾肥龍話多兩錢,而唔敢駁嘴.

無錯,喺做事既角度去睇,肥龍可能好有道理,亦可舉出例證令所講既理直氣壯. 但當換轉喺同事既角度去睇時, 呢類說話就可能令到佢地覺得肥龍不留餘地,甚至令佢地更加無信心.

當然,肥龍都知如果可以心平氣和去講就得,但有樣野好怪,當你開始鬧開既就會繼續鬧.不過發老脾就始終唔係咁好,唔值得同情囉.

既然唔講都講咗,再講都無用. 唯有當下次再忍唔住時,停一停, 諗一諗, 深呼吸,克制自己果刻既脾氣.

而肥龍其中一個聖誕願望, 就係可以回復心境平靜,發少啲脾氣啦.

最後就係要感謝同事既包容及諒解,繼續衷心合作.

阿波羅13号裡既太空人

"Houston, we've got a problem..."




如果有睇過呢套片,都會記得戲中太空人及太空總處既專家如何排除萬難,將被困喺有故障既太空船裡既太空人送回地球.

其實每日肥龍既工作同以上情節非常類似. 分別係肥龍並非太空總處既專家,反而係太空船裡既太空人. 並且係要自己想辦法返地球既太空人.

除咗管理團隊、達到銷售目標外, 肥龍每日既工作就係構思、策劃及執行唔同既銷售項目. 簡單既可能係開發(或者叫"撬")策略客户, 複雜啲既就可能係推出新服務或產品,更甚係重組銷售策略、並為所有改動作配合、內部調校及培訓.

每個項目,肥龍身兼幾職. 而通常如果本身已有一定經驗的話,項目既構思、策劃都應該唔會太過困難,只要做到點子或建議合乎情理及似模似樣,要通過基本唔會有大問題. 但係如果講到執行,雖然大部份項目未必需要肥龍親自去"跑", 但講真嗰句,如果項目途中有乜冬瓜豆腐或者需要跟進,最後都總係會去番肥龍度處理. 如果唔係項目經已完成,都唔敢隨便鬆一口氣,所以可以講承受既壓力都幾大.

亦因為呢個喺執行上既設定,當特別係喺項目發生問題時,肥龍既角色就會好似阿波羅13号裡既太空人一樣,要設法返回地球(即完成項目).

真心嗰句,其實除咗怕煩外,肥龍就真係唔介意做同辛苦. 但喺過程裡面,肥龍覺得最辛苦既就係嗰份"孤單感". 因為好多情況都係同事搞唔掂或者係搞到一半時要肥龍接手,而肥龍就要好有耐咁去了解整件事件,再組織、思考下一步可以點做.但係其實有啲肥龍所諗既方案,可能肥龍自己都係斷估冇痛苦,真係要試過先知得唔得. 而整個過程,就如人格分裂咁,好似有兩個自己喺度對話同度計.有時冇貨交或者腦便秘就仲惨,總之有苦自己知. 而且有時之後仲要Motivate番同事繼續去做,有時都未必話咁就得.如果撞正位主觀較强既同事,花既時間同功夫就更多.

不過肥龍都會好正面咁諗,起碼都係一個方案,唔得咪再諗/試第個囉. 而且經驗往往亦因此而來及累積,其實都算唔錯.肥龍希望有朝一日呢啲經驗可以提供俾同事一啲額外既資料及參考. 始終覺得世事如棋局局新,項目亦然. 況且呢啲建議都係肥龍一面既方案,有可能受肥龍既能力及經驗所限,只可以話聽吓無妨,信哂就自理咁啦.

我們都是認真工作的...

或者將標題講成"敬業精神"更為恰當.

每次肥龍遇見一啲(社會普遍認為)看似職位低既人認真工作既模樣時,心中硬係有種戚戚然既感受.

肥龍出身小康之家,屋企絕對唔算有錢,但又未算窮咁囉...依家總算打緊份唔錯既工.肥龍心諗,去評價一個人事業上成就,係咪只係着眼喺職位,社會地位,人工,或者喺邊到返工等就得呢? 肥龍講得出黎,當然認為唔係啦.

其實肥龍覺得做工或做事, 跟尹思哲所講一樣,主要睇三樣要素:能力、勤力及態度.

能力同勤力暫且不談. 肥龍今次想講主要係態度.好似今日咁,肥龍有個客喺中山山長水遠坐船黎香港同肥龍開會傾一個新項目(其實個會只係開大約一個小時),所有野傾妥後又急急腳走去中港碼頭坐船返中山. 講真,項目傾成,肥龍固然開心,但同時肥龍喺呢個客身上睇到一樣依家好多人都無,又或者比較難見到既,就係 -- "認真工作".相信,呢個客如果唔係對自己既生意着緊及認真,未必肯咁做.而且喺大陸都有其他同行選擇.

認真工作,聽落理所當然,但原來又好似好遙遠咁.肥龍每日見唔少人(同事)自怨自艾,嫌呢樣嫌果樣,總之依家所有問題就同佢無關, 又或者佢自己無乜責任咁. 另外,就係見到一啲人既工作能力同態度好似滑哂牙咁,做野馬馬虎虎,得過且過,無里衝勁,驚死蝕底咁. 反而就好少見會有人主動指出問題,更枉說提出改善方案. 有人就會反駁肥龍話依家係知識型經濟,靠食腦喎, 唔係死做爛做就可以出頭. 可惜肥龍覺得呢啲都係藉口,唔通知識型經濟就唔駛認真工作?

而且肥龍有時諗自己其實際遇都算唔錯,起碼可以讀大學接受教育,亦因為呢種學歷可以喺畢業後揾到一份起薪及工作性質不錯既工作. 相反, 好些人可能因為出身問題,家境問題,際遇問題及其他原因....等, 只可以選擇一啲比較"次"或有限既工種. 以薪金計算肥龍可能以倍數計咁比某些人多,咁唔通肥龍既事業成就亦以倍計好? 況且若果比較工作認真程度,可能大家差唔多咋! 所以,每當肥龍睇見有人認真工作時,除咗會有應有既尊重外, 不自然亦會流露出欣賞既神情. 相反,若見到一啲其實學歷及工作經驗唔差既人做野唔認真或者得過且過既人時, 肥龍就非常勞氣及反感.

記住, 大家所相差既, 可能只係一個機會.

最後, 肥龍除希望所有人可以欣賞認真工作既人,及可以有份欣賞其他人敬業精神既心.如果唔係有人默默耕耘,有好多野大家未必可以咁便利.

最近特別忙

最近忙到死...又要追數埋尾,又要搞client events....仲有annual dinner.....

結果就係連上blog都無時間....

不過最近上網發現心頭好,一於搵日落銅鑼灣訂書先...就當係送俾自己既聖誕禮物啦！

後記> 原來唔駛訂喎...最後喺太子聯合宇宙船買哂兩本,盛惠四百八十元!!睇完又睇,仲係覺得十分正!

井上雄彥

當年既突然完結,令嚴重迷戀SLAM DUNK既肥龍久久不能平伏.

事實上,肥龍對"SLAM DUNK"既鍾愛, 已經超越漫畫既層面. 除咗精緻既畫功、故事情節緊張外, 井上先生對人物既描寫及交代,甚至係說故事既能力, 可以話係無出其右.

因為"SLAM DUNK"....
...只踢足球既肥龍, 去學打籃球;
...喜歡打天才波既肥龍,學故事裡既角色一樣,每天去練習, 去改善;
...大學畢業試温習時,用故事裡既情節去鼓勵自己温習;
...儲埋好多"SLAM DUNK"既精品,月曆及海報;
...好似好多井上先生既粉絲一樣,在漫畫節時走去排隊攞井上先生既親筆簽名 (但因為實在太多人輪候,最後都係攞唔到!);

因為"SLAM DUNK", 令肥龍做咗好多到依家自己都解釋唔到既事.

姑且不談當年突然完結"SLAM DUNK"既原因. 及後雖然井上先生繼續有其他作品發表, 但可能由於珠玉在前,始終還是覺得無復當年.

後來, 偶然喺JET雜誌睇到有關"浪客行"既書評後,以一試無妨既心態一口氣買咗共21集既"浪客行"番屋企,再次接觸井上先生既畫功、故事及漫畫世界. 讀後發現井上先生除咗畫籃球漫畫外, 原來畫古裝(古代故事)亦實在有一手,畫面簡潔有力,分鏡出色,並且能夠刻畫出人物裡既氣魄及內心變化. 不自覺地, 肥龍已被這個"宮本武藏"既故事所吸引, 並一直收看至今(至第24集), 更非常期待未來宮本武藏與佐佐木小次郎既最後對決!

今日, 肥龍行街時發現一本日本雜誌("SWITCH")有有關井上先生既訪問及有"浪客行"既插圖, 二話不既,立刻買下並妥善收藏.

最後,奉上兩個井上先生參與既SHISEIDO廣告一同分享!

SLAM DUNK


DRAW YOUR STYLE

不亦樂乎

肥龍剛啱從樓上樓下既朋友A家既聚會回來.

有時一大班人吹水就係咁過癮同暢快.話題包羅萬有,總之就講之不盡. 如果聽日唔係要返工,今晚隨時傾通宵.

首先從毅行者既過程,知道CPS隊如何以三十多小時完成整段麥徑. 而練習期間時既趣事(灣仔峽,淺水灣7-11 叮野食等), 以及當日途中所見所聞, 如飲薑茶,上山時賣老抽, 飲西湯等. 真係好想明年同大家一齊參加, 甚至仲有A. B隊添!

另又有講到做陪審團既過程, 悟出打官司係有錢人既福利外, 同無論如何都唔好犯事, 就算有都千祈唔好被人捉到, 否則你一生所餘既光陰就將會落入(可能好求其既)陪審團既結論中.

跟住再講就有做Focus group 及街頭問卷調查既攻略. 最好就乜都唔駛講同答, 只係俾少少意見, 或者係啱啱夠人, 收番幾舊水就走人.

仲有........等等...

期間無盡歡笑, 談得不亦樂乎.

最後, 希望我地說話既聲浪及笑聲, 冇嘈住A 嫂及晴晴瞓覺啦! 如果唔係就sorry 哂, 下次或者就由肥龍做東啦喂!

Time goes by - Every Little Thing

每次聽呢隻歌都會有唔同既意會, 不變既係始終喜歡它的旋律.

今日再聽,令肥龍諗起好些往事. 感覺時間真的過得好快. 每日勞勞逸逸,好些東西擦身而過,但身邊的也未必能兼顧.

因為有時間, 能令人淡忘一些事. 因為有記憶, 令人更珍惜(曾)所擁有, 原來得來不易.

壽臣山 - Shouson Hill

肥龍諗每日好多南區人行經壽臣山 (Shouson Hill), 都未必知道原來呢個地方係以周壽臣(1861 年 -1959年)命名。而且以"Shouson"咁洋化既名稱,相信大多數人(包括肥龍)都以為Shouson係英國人(如羅便臣道,堅尼地道等以殖民地時代政府官員名稱命名). 唔講真係唔知,原來Shouson係中國人喎! 多得蘋果李八方尋日喺專欄指出壽臣山既名稱既由來,令生於香港仔,心繫南區既肥龍又知多一樣有關南區既故事.

原來一生事業輝煌既周壽臣，當年除做埋香港立法局議員外、仲成為香港首位華人行政局非官守議員，及獲封為英國爵士。亦因為佢咁威水，所以當時英政府更將香港島南區壽臣山及壽臣山道以佢命名，表揚佢既貢獻。


另外,肥龍整咗個有關南區既BLOG (http://southerndistrict.blogspot.com/). 除咗有肥龍所拍既照片外,更附加Google Earth既座標作參考, 冀望能令各方訪客可以更深入知道南區呢處地方外, 並能分享呢處大自然既景色同山明水秀. 謝謝!

Animals in the womb

喺媽媽懷胎十月既BB胚胎大家或者睇過. 咁小象、小海豚同小狗既胚胎又見過未?

最迎有外國電視節目製作公司把鏡頭探進動物母親既子宮，令呢啲咁難得既畫面首次呈現眼前.

生命真奇妙! 肥龍只睇相片已經非常感動,希望可以快啲喺"畸寶"有得睇啦!

Ian Thorpe 退休了

肥龍自少游水唔叻,但就非常鍾意睇游泳競賽項目, 尤其自由式既項目.

尋日,知悉Ian Thorpe (科比)決定退休了.

雖然肥龍明白運動員生涯短暫,長江後浪推前浪自然不過,但當聽到所欣賞既泳手退休既消息,心裡難免有啲囉囉攣,始終未必再有機會喺大賽睇佢既表現啦.

朋友K寫得啱,人生身處或到達不同階段時,就會為不同既目標奮鬥,千祈唔好只滿足現狀. 因不進則退.

"大腳八" 、"鯊魚戰衣" 、"最後五十米開始用埋脚踢水開TURBO" 等描述依然歷歷在目.

願祝科比喺佢既新歷程上再放光芒.

"I've reached all of the dizzying heights of this profession. I've had all of the success that I never thought would happen for myself, and for all of that I'm extremely appreciative."; "I'm happy with what I've done. I'm happier now than I've ever been." - Ian Thorpe

給家長的學前教育

相信今日有睇報紙既朋友都會對呢件事嘖嘖稱奇, 竟然會有家長主動要求長子留班而去增加次子入讀同一間名校既機會.更驚嘆既係呢位家長仲可以話為咗呢個目標,冇所謂, 大家都要犧牲!!

究竟我地既教育制度出現咩問題?又或者社會既價值觀已"進化"到一個咩既地步?

肥龍喺度唔係講如"入讀名校並唔代表你(既子女)特別叻,而入讀非名校就唔代表你(既子女)特別差"呢類大道埋,反而更想思考究竟家長應該或有咩權利去為子女選擇一間咩既學校呢?

作為子女,原則上此權利係完全既假咨詢. 譬如如果小六時肥媽同肥龍講因為屋企想細佬讀埋同一間小學要叫成績無咩問題既肥龍去留班,肥龍除咗硬食外,仲可以點? 如果應用相同邏輯,基本上肥龍只可能成為一位應聲蟲,基本上可以不求甚解(因有大人作決定),凡事照單全收,達成肥媽定下既目標.

家長往往會用自己年少時既際遇及經驗去評估,假設,避免或彌補等,並定下一啲認為應該及唔應該做既事或決定.

另外,對肥龍黎講,返學除咗求知識,應付考試外, 更大樂趣就係一大班同學去踏波,游水,宿營,去黃金買模型,打機...一字記之曰:玩. 而肥龍既價值觀,性格,待人處事及態度基本上亦由呢啲事裡萌芽,建立及成長. 所以肥龍覺得如果間學校既校方過得去既話已經OK啦.講真成績好唔好,真係閣下自理.

而且肥龍覺得人係好奇既(特別係小朋友),家長只需協助培養學習興趣就得啦.

肥龍唔知係好彩定唔好彩. 肥媽因為知識水平所限,基本上揀學校事務任由肥龍作主.而肥龍當年揀所讀既中學主要原因係男女枚外,仲有PE游水堂(果時唔係咁多學校有架!),結果盲蹤蹤咁就入咗去.而後來既校園生活,由於喺肥媽長年累月既無而為治(因去咗打麻雀)下,只要唔考第尾及升到班,肥媽絕少過問. 但肥龍亦由呢段時期開始學習獨立及為自己既事打算.

有時肥龍反思覺得學前應該接受教育既唔止係學生,其實應該包括家長. 人老有時就愈係諗唔通.最好仲係學卷制及有退稅,到時可能人人爭往上.

逆境裡既團結

肥龍啱啱個星期四同個同事見完客後去咗飲野(係飲珍珠奶茶,唔係飲酒!). 其間肥龍問果位同事最近開會又多,年尾又追數,做得辛唔辛苦咁.同事都好老實咁話辛苦就實架啦,並謂其實大家(指其他同事)都知公司既要求係點,只係依家就要打醒十二分精神去做,不容有失.另外同事再話雖然覺得辛苦,但依家可以接觸及學既野都相對多咗,反而唔錯添.

呢番話令我諗起兩個禮拜前同老細既一席話. 其實老細都有擔心會因為最近既工作量及要求令同事(指肥龍果team)感到好大壓力,從而產生反效果. 肥龍既內心諗既又何嘗不是呢? 肥龍比老細清楚既係各同事已經同肥龍做咗野一段時間,基本上大家有乜可以做到,有乜唔可以做到,肥龍大概心中有數.但至於大家既情緒方面既,肥龍就真係無咩頭緒.

只係肥龍比較阿Q, 希望做到將心比心,大家一條船,共同進退咁啦. 不過如果真係有同事話頂唔順而想辭工,肥龍亦會相當理解,但當然會極力挽留啦.而肥龍同老細都覺得,有時人或團隊都需要一啲外在因素刺激(例如逆境,共同目標或敵人,競爭等)而令本身更加團結,只係過程要經得起考驗. 另外就係大家對事情既睇法,任何時候,特別係逆境時,正能量就更顯得重要,正所謂人心所向,如果一齊做盡咗力既,結果係點未必最重要,更重要及珍貴既反而係大家想做好件事既埾持.

講番肥龍同果位同事既對話. 之後肥龍又問果位同事大家點解開會時唔出聲,況且肥龍唔覺得佢地冇野講咁. 同事就話大家當然有野想講,只係大家都希望講一個最好既答案比肥龍聽,但又未諗到,所以咪唔敢講出黎囉.呢個情況肥龍亦有考慮過, 但正如之前CK所講,肥龍亦一直貫輸比同事一個"其實我未必醒過你"既概念. 有時肥龍問大家意見,除咗真係希望聽吓大家既意見外, 更想大家可以以此作為一個起點去再諗出其他點子, 甚至能指出一啲建議中既盲點及不足(始終大家喺前線工作,客户點諗點計佢地最清楚),令整件事可以更全面思考, 又或者能夠驗證一下肥龍既假設, 甚至推翻. 肥龍與同事不同主要係喺某件事上肥龍可能有比較多既經驗同例子,及失敗既經驗罷.

肥龍素來做事對事不對人, 相反亦然, 並唔會介意. 因為肥龍往往只見到一個人能力上、經驗上既不足,希望能做到集體思考、驗證及實踐,並從中令每個人既歸屬感增加.

終於病咗....

可能最近事忙,開會頻密,又星期五啱啱完成個重要客户聚會,一做完,成個人鬆哂(其實仲有其他野要努力到年尾)!

最後,傷風感冒一齊黎.

今日仲大劑,又疴又嘔,結果睡床廁所兩邊走. 瞓足成日,依家先上網,精神十五十六下寫緊野.

聽日繼續休息,希望快啲好番啦..@_@

整張正相,為自己打打氣!

一派胡言

尋日考評局定出三招防手機出貓:(一)試場內須關機; (二)提早走留試卷; 及(三)資料不註來源.考生若不遵從首兩項規定，會被當成作弊，有可能取消所有科目或應考科目成績。

青年團體代表批評罰則過於嚴苛，增加考生壓力，而且隨時成為考試"陷阱". 並謂考生有時太過緊張，可能唔記得，如果因為咁樣俾人取消所有科目，非常殘忍.

聽後覺得呢位代表簡直一派胡言.

依家講緊考試出貓,出貓已經係錯,試問如果考生冇心做(出貓),又關乜野事? 情况等如講禁煙區條例一樣,如果閣下非煙民,真係諗唔出被罰既可能. 肥龍想問各位考生帶手機入試場既意義同作用何在? 而果位代表有冇諗過十年前或更早時,無手機年代時啲人係點樣考試.肥龍就覺得入試場前考生更應該留意有冇帶准考證同文具仲實際啦.

另外有人(包括考評局)話因為考慮到「人道問題」，包括家人可能需要緊急聯絡考生、考生考完試後需向家人報平安等,所以准許考生攜帶手機進場.除咗有急事外,肥龍就覺得好反智. 其實依家好多年青人都係MSN, ICQ, SMS國民,基本上放學後番到屋企都係對住部手機、電腦多過對父母,兩代既溝通亦已有障礙.另外,考完試後需向家人報平安,咁同學平日放學或去完街又有冇咁做呢? 而做父母既,平時因為工作忙未必有時間為子女學業着緊,反而到考試時就大為緊張,又代表咩呢? 呢啲人道問題,究竟有幾多人真係會咁做,肥龍就好有保留,木宰羊.

整件事令肥龍覺得大家(包括社會)過於保護年青人.如果因為呢三招都可以增加考生壓力,咁不如喺考試季節每位考生專車接送到試場,並為考生準備一切所需物品,考生要做既就只係答試卷,好未? 相反,如果咁都克服唔到,以後讀預科、大學考試及出黎社會做野趕死線(DEADLINE)時點呀? 呢種現象,無怪點解咁多人成日講"一蟹不如一蟹"、"無記性"或"唔捱得"之類等說話.

最後,雖謂"求學不是求分數",但畢竟係考試,應該認真看待啦.

淺水灣狂想

之前肥龍講過, 香港仔或者南區吸引人既地方就係夠LOCAL, 夠街坊, 周圍都係山同海, 真係硬SELL自然環境同寧靜. 而肥龍每個週末,因為要準備渣打馬拉松,定必由香港仔跑步至淺水灣,然後就喺淺水灣稍息.

其實每次肥龍跑到呢處既時候,唔知係因為時間關係定係其他原因,發覺沿途多見"外籍人士",少見華人/香港人.究竟咁係代表外籍人士特別鍾情户外景色,定係香港人鍾意瞓覺,唔鍾意户外活動呢?

可能因為主觀願望驅使,肥龍硬係覺得其實淺水灣係可以有好大發展空間. 肥龍所指既梗係唔係房地產或商場呢啲發展,而係好似美國LA 既Santa Monica海灘咁,發展成為一個除沙灘外,俾所有人休閒,輕鬆同消磨時間既小社區. 肥龍喺96年首次踏足Santa Monica, 發現除咗到沙灘游水,曬太陽外,原來仲有好多野玩, 例如你可以租單車, Rollerblades喺特定既小徑上面奔馳, 鍾意打波既又可以到旁邊既籃球場打街頭籃球. 更勁既係果度竟然仲有啲簡單既健身器械提供,俾你練大隻後"蘇"吓你肌肉.如果文靜既你,又可以到碼頭既餐廳飲杯咖啡睇吓人,睇咗書. 一家大細既,甚至可以去碼頭既摩天輪遙望太平洋既景色.肥龍幻想如果有一日真係願望達成,本來週末假期留喺南區既肥龍,更加不作他想啦!

其實依家淺水灣都唔錯,只係撇除咗肥龍既主觀願望, 現實只有沙灘一個(雖然都有沙灘排球區),薄餅店及便利店各一間. 而遊人大都到呢處參觀廟宇罷.

迷失中環

今日肥龍喺逛書局時無意發現原來方兄(卓如)喺"國金外望"後出咗新書!

其實都唔算全新內容,百幾頁,個零鐘讀完. 但正如內文所言,係為雲妮,美蓮情史補白,當中更穿插個別博客留言,非常過癮!

睇開"國金外望"既肥龍,當然諗都無諗,港幣$68元乖乖奉上. ;-)

毅行者

朋友A, 朋友H, 朋友K 及朋友P,

知道你地為咗準備聽日毅行者喺最近兩個月既週末不斷練習, 非常感動!

雖然肥龍冇份參加,不過都會好似其他CPS人一樣支持你地, 盡力呀! 頂住呀!

其實肥龍真係十分之想一齊行架. 依家仲好記得同懐念幾年前綠色力量一齊過終點果一剎那!

今年既然大家知我既原因,下年預埋我啦.

星期日朝等住你地飲茶呀! ;-)

肥龍上

黑色星期一

今日肥龍黑仔到痺,除咗每日既例會外,下晝再開五個鐘會,冇水飲同排毒.但都唔夠電腦死硬盤機(Harddisk)嚴重. 正當肥龍晨早番到公司準備工作之際,忽然睇到死機畫面,真係乜Mood都冇哂. 但因為時間太早(大約早上八點),IT Supports又未返,乜都做唔到.下晝再問IT, 電腦仍在搶救中!

最後今日所有文書只有以親筆處理,而同事亦識做,打印一份放喺肥龍枱面. 其實,冇得用電腦一日,冇得睇及發送電郵,頓覺百無聊賴,但自我感覺良好,反而做野仲集中同直接咗!

# 米高, 肥龍保你大,聽日真係幫手整住部電腦黎用住先呀!

馬達拉斯

因為"施丹頭槌"事件,令原本名不經傳既馬達拉斯為人所認識.

肥龍再提起馬達拉斯當然唔係仲想講呢件"Out爆"既事,只係上星期一場意甲(意大利足球聯賽:國際米蘭對AC米蘭)背後一段逸事令我再對呢位仁兄再感興趣. 事源本身係國際米蘭球員既馬達拉斯既兒子竟然係對家AC米蘭既擁躉,所以喺呢場波上佢兩位既立場係對立既. 於是馬達拉斯就同兒子打賭呢場波國際米蘭一定嬴,而且馬達拉斯仲話自已一定有波入! 結果係點? 唔到你唔服,真係得咗!而喺比賽中,馬達拉斯因為入波後拉高波衫展示內衣所寫既字句慶祝(大意係祝兒子生日快樂!),結果俾球證出示黃牌,兩黃變一紅,出場! (註:根據現有球例對球員入波後既慶祝動作指引,球員入波後唔準拉高/除波衫、走埋球迷裏慶祝,否則一律黃牌)

原來除咗茅柴之外,馬達拉斯亦有温情既一面.其實肥龍一直以來都鍾情於一啲天使魔鬼既"有個性"球員,作用就如以前籃球裡公牛隊既洛文一樣,有呢啲所謂既"壞孩子",大家先會覺得/感受到球賽裡激情,亦因為佢地令球賽內容變得豐富.相反,唔係既話,大家都未必覺得個別球員既品格高尚. 况且,既然能夠成為職業球員,技術及體能自然有番咁上吓啦.

另外,呢件事亦顯示現有球例既無稽. 真係好攪笑, 入波理應係球賽裡面既目標同高潮所在,亦係所有目光同榮耀集一身既時刻,喺唔傷害或侮辱任何人既情況下,肥龍覺得任何方式既慶祝動作都應該可以理解同值得共享既.如果唔係情况就好似你喺會考9A,升職加薪或簽到大客/大單後叫你唔好慶祝一樣咁白痴!唔通等踢完成場波返番入更衣室自己靜靜雞做咩.仲有就真係唔明,究竟不同既慶祝方法比一啲不君子行為/職業犯規/粗暴踢人犯規,邊樣更值得受到警告呢?

唉~~可惜白禮達(國際足協主席)唔係咁諗,仲有唔識睇中文!

入球精華: http://www.youtube.com/watch?v=3wfPpkPyQqc

責任心

雖然唔想咁講,但今日發生既事,令肥龍真係覺得比自己年輕既一代(特別指公司某君)既工作態度愈感失望,更甚至到達忍無可忍既地步.肥龍所講既唔係佢既工作能力,而係佢喺處事態度及責任心上面,根本俾唔到肥龍感覺到佢既付出,或者係大家一般所講既"上心"啦. 雖然肥龍未致要佢識得企喺老細立場幫老細解決問題呢種層次,但若果只係慣常既工作報告及一啲職責所在既事,肥龍真係唔會預期有咩閃失或是"漏波". 但現實上,此君經常"漏波",甚至要肥龍send reminder提佢先識得交, 就真係講唔通. 而就算肥龍耐唔耐捉佢照肺,講出肥龍既不滿同要求. 佢除咗認衰同講句sorry外,雖然都會即時有改善.但當日子過得咁上吓,又再故態復萌.

有時肥龍諗,我理得你話你點叻點本事又點? 但若果同事樣樣都要肥龍提,肥龍催先曉做,後知後覺,肥龍早就唔應該叫肥龍,應該改叫"肥媽"! 真係做到阿媽咁就死啦.至於肥龍既立場,從來都係企喺同事既一邊,如果肥龍要同同事劃清界線,其實只要正斥其非就可以,亦唔需要好似平時及依家咁花兩個鐘去傾點樣去改善.肥龍講過,各同事都係肥龍請番黎,肥龍責無旁貸咁要令各同事可以喺自己既崗位達到公司要求. 相對地,同事既責任就係了解自己既不足,認真去改善, 執行及把握機會.

CK之前排喺佢個BLOG寫過,其實亦係肥龍既心聲.過去一年多肥龍對同事特別寬鬆，除咗因為大部份同事亦喺期間加入,肥龍覺得需要時間適應外,亦係希望大家可以每天工作時能輕鬆愉快一啲,有謂"Happy employee, Happy organization".但咁唔代表肥龍係一個要求低,苟且既上司.肥龍曾經講過,亦可以做到 - 就係無論公司上下,職位大小既同事,如果有野搵肥龍,肥龍可以做既幫既,自當會幫.當然到肥龍老細叫到既,緊係要再著緊啲,保證萬無一失啦.唔係因為肥龍唔怕蝕底,只係覺得每樣野都要全心做好,亦有責任妥善辦好,唔想煩到其他人或下手接手既同事.

當肥龍諗起"水裡水裡去,火裡火裡去"呢句, 可能俱往已.

"乜"資公司 (三)

終於講到歐資公司. 其實歐洲咁多國家咁多公司,以肥龍之輩既資歷同經歷點可能講得哂. 為免班門弄斧,肥龍只可以憑經歷講打緊工既"德"資公司.

可能肥龍一切受歷史及觀看足球所耳濡目染,喺未做呢份工前,當一提起德國公司,肥龍心裏自不然諗起兩樣野:(一)嚴守紀律,冷漠,精於計算,重決策,並等於沉悶; (二)男性主導,國家主義.

不過當肥龍正式工作並有更多認識及了解後,發現敝"德"資公司既管理特徵竟然係介乎之前講既"港"資公司及"美"資公司中間.

喺管理架構上,基本上大部份重要職位(總經理或以上)都由德國人出任,就算喺有强烈民族主義既日本,情況依然,更甚者由於貴為敝公司亞太區總部,大部份亞太區既功能經理亦係如是. 而可能肥龍身處於技術公司,基本上,就好似金利來領呔咁,係男人既世界. 當然梗係有女性經理,但亦係少敫,或普遍出任喺人事,市場,行政等功能上.喺德國公司做,有一樣係喺"港"資或"美"資公司未必會出現既-- 就係語言問題. 雖然, 基本日常運作大都可以用英文去溝通及處理.但有時一啲由總部,或由顧客方面既信息就好多係德文書寫,唔識就係唔識,亦唔識答. 因為呢個理由,溝通及信息既傳達顯得好重要,所以唔難理解為何大部份重要職位及功能經理多由德國人坐鎮, 因為有乜問題,直接打電話過德國攪掂.其實公司亦有鼓勵同事去讀一啲德語課程(如初階及商用德語等).肥龍唔識德文,但對呢個狀况有兩種見解: (一)識德文當然有實際及即時對工作既幫助,特別係對客户方面,依家主要係靠online translator或者真係走向問人; (二)但喺內部上,有時有啲敏感消息及資料,老細們未必想俾肥龍知.唔識,可能令佢地減低對肥龍既戒心.所以針無兩頭利,因應環境,各取所需啦.

至於專業知識與技能,可能因為德國既教育制度關係,一般都十分重視學歷,而係德國本土,喺名片上印上學歷/專業資格亦好常見. 當然,經驗固然重要,但直覺上肥龍覺得如果你係冇相應既知識同技能,可能佢地連眼尾都唔"瞄"你一眼.而且喺日常工作上面,絕對可以反映出德國人嚴守紀律,精於計算,重決策既一面. 可能大家會話喺咩公司做都一樣係咁架啦,理得你"乜"資啦,有乜特別?肥龍覺得德國人特別鍾意分析 (analysis),而主要分別係除咗能提供精確既數據外,所有既意見及建議必須言之有物並要有客觀標準,並非一啲吹水或過骨既建議可以過關. 就算係一啲(肥龍覺得)比較小或簡單既決定,好多時老細都會問好多前文後理,問長問短,甚至最近三至五年既數據,然後慢慢同你傾. 聽落好似覺得好煩(實情都係! ;-)),但當想深一層,呢種管理除咗特顯德國公司既特質外,實情就如肥龍之前一文所講老細可能更想知公司係閣下可唔可以manage所負責既功能及工作, 或說服或提升老細對閣下能力既信任.若取得老細信任後,整個過程自然可以縮減不少. 另一樣野,其實肥龍覺得非常合理及理觧,但就有啲同事覺得德國同事唔尊重及聽取佢地既意見,就係普遍德國同事覺得只有德國人先最了解德國市場,亦因此就有佢地固有既睇法.而佢地更直言德國係最難打入既歐洲市場,如果企業可以進入德國市場, 其他歐洲市場必定易過食生菜, 但係咪真如所說,肥龍無從稽考.

就上段所講,喺一般情況下,作為係執行者,閣下應處處表現出professional既一面,並且喺應該既情況下講出事情既正確評估及想法.而至於同老細關係同相處之道,亦同之前肥龍所講既"乜"資公司有好大分別.直覺上老細不論係好與壞既消息,佢地都希望閣下可以喺冇隱瞞下告訴事實既全部,咁可以俾佢地作出適當既評估及預算.好果面就係佢地聽後真係會幫你頂,你唔講可能反會怪你.但唔好果一面係你要喺老細面前認衰,呢點未必每個人可以放開、諗得通及做到. 始終覺得對老細喎....咪啦. 不過俗啲講句,你就試下"線"或"累佢一鋪,肥龍包你一切玩完.不過喺德國公司工作,亦有人性既一面,通常佢地都比軟念舊,重伙伴關係,亦甚尊重家庭時間及工作/生活既平衝,喺閣下可以Manage既情況下,一般都唔鼓勵OT,呢點亦係肥龍欣賞既地方.

自訂車牌拍賣後感

當你有七十萬閒錢時,你願意花在一個車牌上嗎?

肥龍每次聽到有關自訂車牌拍賣既消息或新聞時,總覺匪夷所思.唔係肥龍"憎人富貴厭人窮",但有啲說話不吐不快.

當然呢啲係有(閒)錢既人既事或玩意,唔係肥龍等小輩既智商同財富可以理解及明白.但自訂車牌呢樣野對肥龍黎講,已達到"貼金"既程度. 甚於當街同人講自己有乜有乜.

有人揸法拉利,波子,可能係因為車主欣賞車既性能同外型.

有人揸Benz, BMW, 因為代表某一個社會階層或需求.

但一個七十萬既"FERRA1"車牌,可唔可以有人話俾肥龍知代表乜野?

喺今日,當大家諗到政府擬擴闊稅基向所有市民推銷GST,又有人為勞工階層爭取最低工資既同時,究竟車牌拍賣係反映一個點樣既社會現象呢?

另外,政府可唔可能安排將拍賣後所有收益指定放喺來年度施政報告既個別範疇/項目上(例如教育,老人,醫療等)呢?又或者好似以前咁由公益金舉辦呢?

最後,你估"DRAGON"呢個車牌值幾多錢? ^^

"乜"資公司 (二)

上次講華資公司,今次就講美資公司.

一言以蔽之:殺戮戰場, 贏者攞哂 (Winner gets all)!

唔知係因為管理文化定係點,原則上係一如外界所云 - 目標為本(Results oriented),其他事就以此為起點而衍生成為不同既行動及配套.每年初各部門及各人會定落一啲工作目標,然後隔半年就評估一下,再修正,跟進,年復年年,並喺年終作評分,而此評分亦與每年人工加幅掛勾,即performance based salary. 肥龍之前工作既公司更將此系統推至另一層次,就係除咗與人工掛勾外,更將評分定下三級制(簡稱A, B 及 C級別). A級為最高分,每年人工加幅亦會最好,而獲晉升既同事之前亦必屬A級. B級中規中舉,冇乜特別. 最"杰"係落入C級,除咗冇人工加外,更要進入死亡之組(簡稱 PIT - Performance Imporvement Team),一如其名,好似賽車入PIT咁,除定下各樣改善指標外,更要喺未來一年全部達標先可以重回正常評估, 否則繼績留PIT, 可謂有排都唔駛出番去. 根據觀察,一般同事平均要兩年先可以脫離呢個死亡之組.另外,每年評估最低分既3%同事一律要"沙喲拉娜",現實過玩遊戲節目.肥龍喺入面工作近四年,(腦力及勞力)亦被搾乾搾淨,壓力之大亦只有自己知. 而可能肥龍既老細既處境亦差唔多,肥龍四年間前後侍奉三個老細. 大家都係過客,或者呢啲就係叫"企業新陳代謝"!

老闆方面,可能因為目標為本,除咗功能/職位上既報告及執行,基本上交到貨就Ok,唔難應付.至於關係,可能大家都覺得自己都係打工,一般都可以隨意啲同直接啲,如果唔係夾唔到,問題不大.

另工作上,一般黎講,每個大項目都會有項目經理或者Champion (雖然可能係兼任),並喺其中訂下不同既Milestones, KPIs (Key Performance Indicators),sub goals等. 好處係樣樣有根有據,而除項目經理外,所有人都係執行者,亦已有所需要既專業知識與技能, 反而重點係你點樣同其他人合作去完成任務 (因為同team既未必同部門甚至同office!). 就算期間有人離開、增加人手都唔會有太大問題.而如果未能夠達標既話,必定有大量跟進工作,直至重回正軌. 另有幸参加不同既項目既"執行者"既定必盡情表現,望有天成為新項目既項目經理.

而就觀察所得,一般美資公司都比較捨得花錢喺員工培訓上. 除咗大都有Training plan外,培訓內容上亦包括各方面唔同範疇,舉例既有一般既Hard skills如product knowledge, technical training/ workshop, 亦有soft skills 如team building, leadership, coaching, mentoring等.另外,如果同事有興趣再進修,若銀碼唔係咁大或者係公司縮緊皮,一般都會批. 講真,呢聽培訓對當年做咗幾年野既肥龍十分吸引, 亦使肥龍既能力喺短時間內有所既提升及提供良好環境去實踐, 唔怕講,肥龍既碩士課程都係公司全費資助既. 除員工培訓外,公司亦耐唔耐做一啲物件(如便利貼,紙鎮,風褸,T-Shirt等)送俾同事黎增加大家對公司既歸屬感.

遲啲講歐資公司.

驕陽無限好,最好去跑步!

肥龍今日放假,咁好太陽,唔好嘥,一於去跑步!

南區苗鍾徑既一段.

"乜"資公司 (一)

本來想寫有關甘泉事件,但落井下石,事後孔明容易,亦覺對甘泉有啲唔公平,不如講吓第樣.

尋日讀信報<經濟,企管>版時留意其中一則有關"華資公司管理人員的特徵",列出以下六項:

1. 與老闆關係
2. 與同事之間的關係
3. 專業知識與技能
4. 忠心
5. 靈活
6. 堅毅精神

肥龍唔知有幸定不幸,畢業至今到過唔同公司做過吓野,當中有華資,美資,英資及歐資. 而跟既老闆亦有由香港人,內地人,台灣人,到英國人及依家既德國人(或歐洲人).不如今次先講"乜"資公司,再另文講唔同地方老闆(管理人員)既特徵.

先旨聲明,後面既說話全部係觀察所得,未必係事實既全部.

華資:同上列所講既差不多,特別係1.同2.至為重要. 做落就會發現原來身邊好多"皇仔",親信同老屎忽,如果你唔係其中一樣,要埋老闆身未必咁易. 好多野基本上都係Top-Down,咨詢欠奉,執行為先.不過一般都有既定程序,只係人治味較重,有啲野只要傾掂或者"心照"就得,亦唔可以斤斤計較,要靈活少少.

另外一般華資老闆(即香港人)通常比較性急,欠耐性,隨時星期六/日下午或者平日放工後打電話俾下屬問呢問樣果樣,亦期望有一定既答案,而發現老闆亦欣賞此行為. 有時如果準備少啲,或者答案唔夠肯定,實行聽"炳".如果老闆主意多多,不時想呢樣想果樣,每日七.十一時,就真係多多都唔夠死.而且普遍發現華資老闆多有舖"開會引",定時會捉哂有關同事面聖,發表吓偉論同觀感,無錯,係觀感唔係觀點.日常亦唔多會傾私人野(如家庭生話,平日做乜等),但佢地就好有興趣想知你住邊"庶",屋企兄弟姊妹排第幾.而間中就算要傾亦要好有技巧,避免觸及一啲敏感問題,犯禁或得罪咗就弊.

至於專業知識與技能, 一般operational既,大致係老闆都係交哂俾你,旨意哂你去做(你唔好話你唔識!). 不過有時就因為部份老闆未必有呢啲專業知識與技能,有好多時會問一啲好基本既問題或者係提出一啲未必執行到既意見,呢個時候,就要花啲時間同耐性去解釋,直至老闆似明非明就OK...

有關其他"資"公司,下次有時間先講.

最後,得知中環天星碼頭下月十二日搬遷,再留下一張照片喺度作見證.

例會之自我補元

最近啱啱去完大陸開咗幾日Product Meeting. 講真,肥龍都幾怕開呢類會,除咗郁吓都要開幾日,令好多曰常工作被逼pending同outstanding外,開會期間主要都係聽野,講野,食野,飲野同諗吓野,實質野就相對欠奉.

而且,肥龍發現每次開完會同workshop後既Action items,多數都係"只講唔做,時光隧道"或者變成老董咁,議而不決,决而不行. 因而肥龍對呢類會既成效一直有所保留. 不過再細諗下,撇除會議正題, 其實呢啲會間接有俾咗唔少"正能量"肥龍.簡稱為自我補元.

首先,開會期間有好多機會同平時conference call只傾過兩句,但未見過面既counterparts面對面吹水.除咗交換咭片呢類指定動作外,吹水期間仲可以收到唔少料（例如佢果邊有咩service賣得或者受歡迎,市場模式,同行動向等等...）. 呢啲資料未必有直接幫助,但就有benchmarking既作用. 譬如自己OK時,當然可以扮吓义燒,得戚吓. 但相反,如果真係唔掂,除咗可以揾人過料實行"吸星大法"外, 仲可以收集一啲其他人已遇過相類似既理由/經驗,行少啲冤枉路, 或第時去同老細解畫既話都可以全面啲.另外肥龍好勝,呢類資料亦帶動Internal competition,對肥龍自我鞭策莫大作用.

另外,每晚晚飯後既networking都非常重耍.誇張啲講,日後如果工作上真係有乜磨擦或者有啲Regional既計劃,最後可唔可以傾得掂數或者做得順唔順,就係呢啲network發揮作用既時候啦. 而就算同相同Office既同事,亦因為朝夕相對,感情都自然好啲,之後返番office做野都會易話為啦.

最後,隨著97後香港回歸祖國,國內經濟蓬勃後,國內同事自我澎張不小. 而"香港"(肥龍代表既公司)既地位就好似香港喺世界地圖咁,愈感愈渺小,最怕遲早連一點都無埋.諗到呢度,肥龍呢類小嘍囉體內既港燦基因同自强心定必同時發作,差在未師傳上身,高呼男兒當自强,一於渾身解數,發揮無窮(其實有限)既小宇宙表現自己,為香港爭番面子.

地鐵尾程優惠

星期五同一個同事等人時傾開,肥龍喺搬屋期間,發現番大約十張讀大學時儲落既地鐵飛(無錯,唔係八達通,係有尾程優惠果隻飛).於是就講咗肥龍讀大學時點樣喺交通費上慳錢,或者套用經濟上既講法,如何用有限既資源去獲得最大滿足感.

肥龍果時喺九龍果邊番學,又無宿舍住,所以每日都要來回過海,交通費計落都幾"熔",亦佔去平日既一定份額開支.番學趕時間,搭巴士又唔到學校,咁自然就揀搭地鐵啦.而揀搭地鐵既另一個原因就係因為有尾程優惠,即用尾程餘額(通常係一毫子)就可以搭過海(如果無記錯,當時學生優惠票價過海為$4.7),計落可以慳唔少.

但呢個方法既局限係通常一個人平均每日咪坐來回兩程地鐵,咁咪要等肥龍坐完"N"次先儲到一張餘額得一毫子既尾程飛? 照咁計,一個月頂多只儲到一至二張,幫補極有限,而用時間計亦非常唔"化"算.

肥龍貪心,成日諗點樣可以快啲或有多啲尾程飛,後來肥龍就諗咗一條屎橋去達到呢個目的.方法就係向其他住九龍果邊既同學買呢啲尾程飛.而肥龍啲同學都唔係羊牯或者係童子軍日行一善,所以亦唔可能用一毫子代價買到.於是肥龍通常都會喺佢地平常坐開既路程既票價加五亳子去收購(講到好似好豪咁!),喺咁既情況下,大部份都唔難Make到deal既. 而為咗提高成功率,肥龍甚至會揾果啲睇死佢放學後都冇拖拍及街去既同學著手,一黎佢地好少(或者唔識)拒絕肥龍既要求,二黎佢地唔會坐地起價.

就係咁,肥龍喺交通費上慳咗一大截.可惜,自從冇咗尾程優惠呢支歌仔唱後,所有野Back to square one.而肥龍亦成手"蟹飛"! 依家諗番同睇住啲飛,都幾攪笑. 有時覺得"諗頭"呢家野,未必完全需要創意,可能只係生活逼人,從生活小節著手,都可能有收獲.

死亡筆記:最後的名字

期待既一幕!



一本以小說多於漫畫既漫畫,每次一本都要分開幾次先睇完.唔緊要,好睇就得啦!

P.S. 在片中飾演高田清美既片瀨那奈絕對係肥龍果杯茶呀! ;-)

舊香港仔避風塘相片

相片應該係60年代喺田灣拍既,雖然細張咗D,但係好有親切感. 原來依家住既地方果時仲係海,鴨脷洲仲未有橋.

我又講禁煙區條例草案

今晚肥龍放工時聽電台Phone-In節目,講及有關草案.聽眾打電話上台各舒己見,其中贊成全面禁煙既佔大多數,只有少數人贊成成立禁煙區. 肥龍喺度唔係想講贊成定唔贊成呢啲野,只係想借呢度分享吓部份聽眾既意見.

先旨聲明,肥龍從小到依家三十幾,一直冇試過食煙(二手煙除外),不過肥龍亦唔反對其他人食煙.

有聽眾話不如禁止賣煙,一了百了.

有聽眾講自己既生話點樣受影響,如何被剝削呼吸新鮮空氣.

有聽眾就提議既然有禁煙食肆,有求就有供,應該有只招呼吸煙人士既食肆.但節目主持人就問喺入面工作既人點,聽眾就話食得咸魚抵得渴,自然有人做.

又有聽眾話既然吸煙人士不理自己同他人健康,不如到睇醫生既時候,非吸煙人士可以優先輪候.

肥龍就諗,如果吸煙人士走去平機會投訴受人歧視,得唔得呢?

另外,如果非吸煙人士可以優先輪候睇醫生,咁相同道理,屋企冇裝冷氣既係咪就可以減電費?因為冇裝冷氣可以減少對環境(空氣)污染.

其實人人生活有自由,共生喺世界上,有時你(遷)就吓我,我就吓你,咪幾好囉.當然有啲人濫用自由、平等,剝削他人,方便自己,又唔抵幫既.

最後肥龍有一樣野一定贊成,就係十八歲以下一律嚴禁買煙及食煙.

重新調校步伐

最近肥龍俾老細照肺捽數.肥龍冇怨言,覺得受人錢財,替人消災.無乜唔妥, 而且出得黎行就預咗俾人彈!

肥龍可能心火盛,亦炳咗班同事一餐.事情實情未至大家所諗咁嚴重...肥龍之所以大動肝火,主要係因為覺得大家處理呢件事情太過表面,並冇諗清楚背後意義及究竟老細想要乜. 正路去睇,老細當然要數啦. 但老細可能更想知公司係有班可以manage客户及銷售既Salesperson (即大家幾位). 真實答案可能係如何說服或提升老細對大家既信任.

一問一答並唔能夠表現出大家既實力,相反,大家應藉此機會去表現出自家如何凌駕所負責既工作及客户,所以大家應該準偏充足,主動提供老細有興趣既資料.

更希望大家藉呢個星期老細唔喺Office,做好準備,重新調校步伐,等下星期例會時再次表現出大家既自信.信任係可以慢慢用時間累績.

管理刁民

因為肥龍打工既公司想喺未來一段時間可以提升工作效率同提高競爭力,尋曰老細就揾咗個Consultant黎同各部門既負責人做"腦震盪"workshop. 因為肥龍身處工程師林立既地方,整個過程令肥龍觀察到一啲幾特別既睇法.

當講及提升工作效率時,工程師們普遍認為最好乜野都有指定程序,等個個好跟,按照程序做事,可以減少犯錯.而組長及經理就可以更直接同簡單咁去睇住個運作. 而依家工作效率偏低既原因主要係因為客户唔知道或消楚敝公司既程序,所以後勤既同事及工程師們"每天"需要花好多時間同精神去跟進.其中有啲項目嚴重Delay甚至爛尾,亦因為係有啲客户有過份要求或希望項目可以特別處理先搞到最尾一穫泡.唔關自己事. 而呢類客户一般被稱為"麻煩客",即刁民也.

聽落有似幾有道理,唔難認同.但若細心啲去諗若真係樣樣定程序,肥龍就覺得有啲問題值得留意.

1.工程師們變成"為程序而去做野"而非"為滿足客人需要", 想客户所想,急客户所急.另外情況亦變成"依上級指示"或"依程序去做"，咁當遇到一啲程序需要特別處理既要求，工程師們斷估都唔會去改變或遷就客户. 更甚係利用呢啲程序黎作為藉口同客户解釋點解個項目Delay、爛尾或停咗喺處,保護自己.

2.製訂制度時通常冇考慮客户需要(雖然把口不停講),到遇到一啲關鍵性既問題或程序時,工程師們既Ego立刻番哂黎並用自我角度或自身限制去定立呢啲規矩或標準. 令人有種頭痛醫頭,腳痛醫腳,閉門造車,出面做咩都唔知既感覺.

3.點解要客户跟敝公司既規矩或標準去做? 點解唔可以跟客户要求去做? 不過咁都未必真係需要客户参與或互動去製訂程序, 客户既要求愈來愈Unique, 有啲做法呢個客得未必第二個客都一樣得,而且有時可能愈問就愈禍. 可惜因為上(2)既情況及缺憾,基本上就算有程序都唔算得係幫客户，而似係為公司製造緊方便.

4.另外,"麻煩客"就係麻煩客,"刁民"就係刁民,佢地既要求,工程師們覺得除非有一組獨立既Team去做(即唔好預我!),否則一律唔Work! 又或者呢班刁民會跟足公司既規矩或標準去做啦!

當刁民遇著無賴公司

本來都唔想因為幾十蚊喺度小題大做,但實在不吐不快. 因為肥龍最近搬屋,好多野要一齊搬, 其中一樣係家居電話線.

肥龍一直都以為"以今時今日既服務態度"有啲野唔應該會發生,又或者唔會預期依家仲會有啲咁既服務態度.姑且喺呢度唔講係咩公司,祇喺度列出有關罪狀.

一、漏Order. 打電話去Hotline問有關安装時間,Hotline果位小姐就話從電腦記錄顯示,師傅曾經某天到訪肥龍屋企時冇人應門, 因此安装時間要從新編排至十一月初. 而呢段期間仲要收費.(實情肥龍屋企一直有人,從未發現有人噤門鐘!亦冇人致電肥龍話將會有師傅到敝府安装)

二、部門互相推缷責任. 同Hotline果位小姐講漏Order問題,佢就話係師傅問題.但到問師傅時,相反師傅就話係台既Sales問題. 但當肥龍指呢個唔係肥龍既責任,要求儘快安装時, Hotline果位小姐又再重覆(一)既答案. 激死(>_<)!

三、當肥龍要求立刻取消合約時,Hotline另一位仁兄指肥龍要繳付合約列明既罰則及款項. (線都未搬,肥龍質疑份合約係咪已經生效,唔明點解仲要俾錢...)

四、肥龍要求向當場經理反映情況,對方總係支支吾吾,總之就唔想轉條線過經理處咁,最後竟然話經理唔得閒,三日之內經理會覆肥龍電話.(三日?唔係聽錯嘛?)結果擾攘吓五分鐘,呢位仁兄先肯幫肥龍轉線俾經理.

五、到連線到當場經理後,肥龍堅持要取消合約時,果位經理反而不停游說肥龍留低,並謂可以喺由最初10月23日,改至10日16日,甚至兩日內(即10月13日)上門安裝.(吓?乜之前唔係話要等到十一月初咩?點解果位經理唔一早就話10月13日上門安裝呢?係咪要等個客(肥龍)發哂脾四先肯俾番啲好既offer呢?)

六、喺咁既情況下,取消合約要等四日後先知結果. (要Make好大個Decision? 肥龍相信淹唔係第一位有此等要求啦,四日真係長咗Ｄ!)

整個過程肥龍表現似刁民, 所受既待遇尤如蟻民,千辛萬苦,原來都仲係講緊安裝事宜,肥龍怕怕...於是決定用腳投票 -- 轉台!

直至呢一刻(10月12日),肥龍仲等緊取消合約既消息. 黄經理,肥龍等緊你Call啦!

開會時間

近日因為不同原因,差不多每日花三小時喺開會上,導致放工時魂不附體,腦汁乾涸,好攰!

自從四年前肥龍升上依家果位後,"開會傾野"彷彿就已經不自覺地咁長伴肥龍. 屈指一算,肥龍每天大概會花三分之一至四分之一時間(既二小時或以上)喺開會上. 如果用一年時間計,唔計見客, Internal Meeting 、內部培訓及到老細房面聖, 肥龍一年裡花喺(已預知既)例會時間已約莫為:

1. 每月例會 - 4小時/月 (48小時/年 = 6天/年)
2. 每週Sales Meeting -1小時/週,共4小時/月 (6天/年)
3. 每月南中國銷售例會 -8小時/月 (12天/年)
4. 每年中國區會議 - 4天/年

1+2+3+4 = 共28天/年, 如以5天工作計,大既5.5個星期.

加埋肥龍一年有3個星期大假,原來一年計差不多已經有兩個多月唔喺Office. 套用無間道劉建名說話方式:"如果有得揀,我想做老sell"! 即淨係去見客唔理內部會議咁多!

有時肥龍都會諗:係咪真係有咁多野要開會先可以傾?仲有(特別係人地Chair果啲)會係咪要開咁鬼死耐,可唔可以直接啲、快啲呢? 當然有啲會議係必須及有一定功能. 因此肥龍喺可以選擇唔開(會)就時候就盡量唔開,或者當住一班同事係咁倚交待幾句就算,如有問題就問肥龍. 就算真係要開,都盡量準備好個Agenda, 少啲Side Track,少啲離題,準時完成.

不過因為肥龍成Team都比較新及全隊平均年輕人多(除咗肥龍拉高咗條Curve!),所以除咗上述例會外,肥龍用咗唔少時間喺1對1既Coaching及跟進各別同事表現,否則如果你對住成班人講,佢地唔當你了哥聽你講先奇!

講辭工(二)

繼續講辭工. 上次講開肥龍轉工辭工既理由,今次不如講吓肥龍收"炒老細魷魚通知書"既情況.

通常接到同事既"炒老細魷魚通知書"時,肥龍都會故作鎮定,然後循例會問點解想走,係咪肥龍有乜禮待不週,或者安排(失)不當之類既問題,好等肥龍有啲 Ideas去諗點樣挽留(當然假設呢位同事係做得野同幫到手啦). 若然挽留失敗,肥龍亦會扮大方去問果位同事有咩好路數,Keep in touch 之類咁. 實際上,肥龍到依家都仲有同其中幾位保持聯絡, 算係好黎好去. 始終所屬既行頭都幾窄,山水有相逢,第日有機會見面時肥龍都冇咁鑑.

而佢地(話)炒老細魷魚既理由總括為以下原因:

一、覺得留喺公司發展有限,並謂公司資源上支持唔到自身發展;
二、冇乜野學,一天復一天,唔知自己做緊乜;
三、嫌人工少;
四、人事問題(應該指同肥龍關係^^);
五、同同事合作有問題;
六、想試新野;
七、達唔到自己定下既要求;
八、已經盡過力,覺得份工或公司唔適合自己;
九、想轉部門

羅列上述理由,想問各位你會點睇?又肥龍其實有口話人冇口話自己呢?

再接再厲

咁快又一年, 去年肥龍用跑馬拉松既時間(2小時40分鐘)黎完成半馬拉松,實在有Ｄ攪笑及失禮. 今年再接再厲,目標希望喺2小時左右完成, 同埋唔好再賣"老抽"咁啦. 訓練日誌正式啟動!

其實自小肥龍就幾鐘意長跑呢種運動,一方面可以做運動及練氣,另一方面跑步期間額外俾咗肥龍一個人靜靜咁諗野既時間同空間, 從而可以思考及消化一Ｄ平時喺公司冇時間諗既事.就算無咩野諗既時候,起碼當減吓壓,等再返工時成個人亦都精神Ｄ同醒目Ｄ. 另外,長跑係每一步都係靠自己既力氣,絕無半點僥倖成份. 仲有既係,参加及完成半馬拉松後肥龍可以大大聲同同事講,唔好睇肥龍咁既身型,其實仲跑得郁架! ^^

有時覺得長跑就如做事. 長跑除咗要有目標外(例如時間,路程長短),仲要夠耐力同毅力.因為喺整個長跑路程中,真係可以隨時諗出N 咁多個理由出黎說服自己要停低休息一下,甚至停哂. 祇不過有時就好似"魔鬼天使"咁有另一把聲音叫住肥龍唔好停及放棄, 最終肥龍先可以堅持步伐完成. 做野亦一樣,要有目標不在話下,但相同經驗提醒肥龍"堅持"既重要, 因為喺做野過程中肥龍同樣咁可以諗出同理由去決定做或唔做一件事,又或者諗應唔應該繼續做一件事,細節祇係肥龍會諗究竟呢Ｄ理由係人為(肥龍能力問題)吖定係受客觀環境影響, 但決定咗做一件事就要貫徹始終. 亦因為咁肥龍亦理所當然咁將長跑睇成鍛練EQ同毅力既方法並一直恆之以久去做.

勝在營銷

近曰肥龍喺電視廣告中留意到呢個港台節目. 前晚(10/3)睇咗第一集,內容都幾OK同Practical, 深入淺出,節目其間會請一D中小企及創業人仕訪問,並用真實個案去分析市場營銷策略及理論. 肥龍做Sales,未見識過固然好,有得偷師. 就算知道既咪當温故知新亦有得著, 始終一個人諗野係有Boundary同Limitations, 而其他人既經驗(特別係生活體驗)都係珍貴既.只不過得半個小時好似有Ｄ唔夠喉啫.

其實肥龍不嬲都有創業既念頭,但係可能有時真係諗得太多及太理性,左度右度,覺得個Model未ready, 又或者覺得無乜Selling Points, 再加上一Ｄ大路問題如創業資金,找合適拍擋,辭工,機會成本等,所以一直只停留喺"齋諗"既階段. 不過, 肥龍想創業既理由主要係想擁有自己事業. 錢當然有諗,但唔係想揾快錢或發達果隻.

More information:
http://www.admango.com/hkej/hkimp.htm
http://www.admango.com/hkej/hkim.htm

講辭工(一)

唔係肥龍尋晚中咗六合彩,準備辭工.只係睇完CK兄,渣古兄講見工面試及請人,諗不如掉轉槍頭,講吓辭工啦.

不過講之前先講星期日晚發生既一件小事. 果晚肥龍"百無聊賴"喺屋企執野時,手機突然響起,電話既另一面應該係位二十出頭既少女(起碼肥龍幻想佢係). 當肥龍只係"喂"完一聲後,對方就立即隔住電話筒一輪嘴講:"Derek呀,我想問呢如果辭工通知少過一個月係咪要賠俾公司呀,然後咁咁咁...(略去二三十字)". 按照常理肥龍應該同該位少女客氣講聲打錯,然後收線就ok. 但可能肥龍果晚真係覺得好悶,弄至潛伏喺DNA內既攪事細胞又突然發作,而該位少女把聲又好似我一位女性朋友, 以為佢借"無間道風雲"上畫時就同肥龍玩無間道,於是肥龍決定胆粗粗代入derek呢個角色去同呢位少女討論辭工既程序同細節.

肥龍有Ｄ唔明白既就係該位少女話佢想同老細(應該叫Carol ^^)要求提早Last Day,但同時又唔想賠錢俾公司(不足一個月通知),好似"老奉"覺得老細一定批, 原因係佢覺得老細不嬲都唔Like佢喎...跟住佢又問我如果真係要賠的話要賠幾多?(但係肥龍都唔知佢幾号出糧,點計呀?仲有Contract應該有提及),又問Richard個Case係點?(相信係另一位剛辭工既同事) 大Wor,遲早穿煲,於是肥龍一直支支吾吾. 最後到該位少女好感慨咁同我講"Derek,我要走啦~~!",好似好期待肥龍(即Derek)立刻同佢講句"唔捨得佢"既同時,肥龍怕穿煲,於是立刻話依家有野做緊,唔講啦,不如聽日番工先傾,就咁收線!

不過以上故事除咗令肥龍覺得該位少女有Ｄ"老奉"外,都會諗點解佢會咁兒戲去處理Employment contract.俾肥龍感覺係佢根本無認真睇過份Contract就簽咗.

其實講到辭工經驗肥龍都有唔少.更有口話人無口話自己. 肥龍大學畢業後首五年前後做過六份工,無份做長過一年(當然唔少得CK所講工與工之間Expected Salary都會加D, 不過人在做天在看,都唔係次次Work既!). 辭工理由五花八門各式其式,有嫌公司規模細(其實都有30零人),有嫌返工地方遠(港島南區<=>赤鱲角),有因為另一份人工多Ｄ,又有因為唔想被屈長駐大陸工作,當然亦唔少得唔妥老細、合作唔黎呢Ｄ理由啦.結果係點?唔問都知就係好似揸車入咗迴旋處咁,行就行啦,不過就原地踏步. 肥龍後來再細想箇中既問題,得到以下結論:

1. 嫌公司規模細 = 好高騖遠,以為自己好掂就指指點點(其實只係做個Engineer仔,同Level仲係無人). 講就天下無敵,做就有心冇力(無經驗).俾哂成間公司同所有人你管啦好冇?
2. 嫌返工地方遠 = Accept offer 或者Send 求職信果時根本就無諗清楚,以為人工高或有人請就OK!
3. 另一份人工多Ｄ = 貪錢,冇認真諗過其實自己有冇份工要既Skill sets,不過個HR同Interviewer都有問題,明知肥龍冇要求既Skill sets照請.
4. 唔想被屈長駐大陸工作 = 同(2)異曲同工,只係問題更大,但肥龍用既處理方法更駝鳥,以為時間可以改變一切,慢慢就會慣.
5. 唔妥老細、合作唔黎 = 無計!少爺仔脾氣發作,冇諗過從來只有做細既迎合老細,邊有老細就番細既轉頭既道理.

本來仲想繼續寫,但周公急Call,下回再續.

旅客點解要黎香港?

上次喺度先講開香港既歷史已經唔係長,有特色及歷史紀念建築物既已經愈來愈少.呢兩日再睇蘋果日報新聞兩則,更顯得政府無稜兩可,協調不足,更感到香港旅遊政策既短視及唯利主義.

首先十月二日蘋果日報曰:香港硬銷人工景點令旅客望而卻步. 報導指十一國慶黃金周旅客由高位回落，原因係本地旅遊業只重內地旅客，而且發展嚴重失衡，摒棄購物、美食天堂美譽，硬銷毫無本地特色既迪士尼樂園、昂平360等人工景點，加埋零團費，令旅客望而卻步.而且忽略歐美等旅客. 遲早當內地人到外國旅遊愈多而見識多後就唔會只滿足於香港金紫荊像呢類所謂景點,就麻煩耳. 相反澳門旅遊業發展極具規劃，賭場雖相繼成立，但各自針對不同顧客，當局又極力保留歷史文化及建築.

另十月三日蘋果日報曰: 政府保護文物古蹟為名,賺錢為實.報導指關注古蹟組織與藝術團體批評政府現有文物政策以「保護」為幌子，將古蹟發展成旅遊商業項目，令人大惑不解. 並謂古蹟係俾港人集體回憶，紀念歷史及讓下一代延續故事既資源，提議改作為博物館. 現有政策既結果係令古蹟得不到應有既保護，或者係長年丟空，又者係變成超市(舊赤柱警署)及商場(舊上環街市)而面目全非,更令市民與遊客無法分享及到訪古蹟.(見下表)



撇開歷史建築物唔講,其實政府有冇諗過旅客點解要黎香港?肥龍廿年前讀小學上社會堂時照單全收相信香港係美食購物天堂,東方之珠等點子.但到咗廿年後既今天,呢D點子仲Work咩? 對肥龍黎講依家泰國曼谷先係美食購物天堂, 買In野新野肥龍就會諗起日本.試問香港既Unique Selling Points係咩先? 殖民地,華洋集處嘛....仲有好多地方留有以往英倫特色或有中西合壁既風貌.

可能有人同肥龍講亞洲有好多國家以前都係殖民地啦,有乜咁特別呀?係架無咩特別架,但如果到處都係人工景點及商場時,俾你會點睇? 肥龍十分認同古蹟係讓下一代延續故事既地方及公共資源.

下次肥龍叫朋友到超市時,可能係想大家接觸一下古蹟,買野為副啦.

澳門遊閒情逸事四則

(一) 飲水機修正帶 -- 肥龍行街時無意中買咗既.原價十二蚊,無講價賣十蚊. 外型攪鬼,仲有得換水(即修正帶).唔知原本修正帶值幾錢或賣開幾錢,但十蚊既話覺得創意最少值八蚊.至少換黎大家三分鐘既歡笑.掂~!

(二)消暑歌-- 喺一間中餐館發現既.呢幅消暑歌有兩大莫名其妙之處:(1)第一句後唔知由邊個方向讀起; (2)內容好似同消暑無關.肥龍才疏學淺,望有高人指引.

(三)相中鏡,鏡中相 -- 成功與失敗之作. 成功:構圖有趣,天公做美,藍天色彩. 失敗:鏡下之框架,鏡內之友人.

(四)金牛,黃牛,白牛 -- 曰:痺,震,爆!

「時光電郵」 - Futureme.org

***轉載自2006年9月26日既蘋果日報***

想和30年後的自己聊天嗎？

一名美國男子成立了「時光電郵」網站，網址是futureme.org ，讓網民發電郵(Email）給未來的自己或其他人 ，寫下理想 、抱負，助人思考將來，回望人生。「時光電郵」最長時限30年，但大部份人選擇三年內發出電郵，約1/10會公開留言 。

********************************

肥龍睇完呢段報導後,其實都有諗過立刻寫返封EMAIL俾三年或五年既自己.

可能係性格使然,週時心多多,想做呢樣果樣. 所以自畢業後,肥龍一直都有為自己工作及生活定下三年目標呀、五年目標等, 然後不時REVIEW吓咁啦. 目的係等自己唔駛好似隻烏蠅咁,亂衝亂撞最後弄至七勞八損, 又或者得三分鐘熱度,然後浪費時間及金錢. 現實D既話自已都想喺若干時間後有D進步及提升.

始終出黎行走"漿糊",揾食要緊,唔係好易比人淘汰或者俾老細炸型.

回想近五年來轉變都幾多,由五年前做到依家做LEADER,到升職轉工,到讀完MASTER....不過有時諗其實係咪個個都差唔多,只係肥龍自己諗多咗咋?

你估以依家既科技趨勢及發展,三年或五年後仲有冇人用Email呢?仲有係點收呢?五年後大既仲有Gmail啩...

最後...肥龍五年前用緊既Email Address都唔記得咗啦~~(因為轉咗"N"次ISP啦^^)!!

中環天星碼頭

一天乘搭天星小輪到中環後抬頭一望既映像. 覺得畫面構圖對比好大,所以拍下以作留念.

如果香港國際金融中心代表今天香港既先進同繁榮. 咁中環天星碼頭就代表往日(殖民地時)香港既發展同變化.

不過係咪要"建設道路發展"就唔駛"保留歷史建築物"? 兩者間係咪不能夠並存? 香港既歷史已經唔係長,有特色及歷史紀念建築物既已經愈來愈少. 政府又話強政勵治.可能香港下一代只可以喺書本或相片睇番中環以前係點? 又或者若干年後從肥龍等老餅口中想當年時先知道邊處以前係D咩囉.


<中環天星碼頭>

由於受到1910年代的填海影響，碼頭於1912年由干諾道中與雪廠街遷移至現時怡和大廈附近一帶。碼頭採用了維多利亞式建築。隨著1950年代的填海工程，碼頭於1957年再搬至愛丁堡廣場現址。碼頭上設有一個由比利時送贈的大鐘。 它是香港最後一個機械鐘樓，大鐘每15分鐘報時一次，是香港所餘無幾的鐘樓之一，現時鐘樓的命運未卜，據政府土木工程處發表的消息，現時天星碼頭、鐘樓和皇后碼頭的位置將會移平作道路和商廈用途，並將於十一月新碼頭啟用後清拆。

<香港國際金融中心>

樓高415.8 米，是香港第一高樓，世界第六高樓，完工於2003年，一般說有地上88層，但事實上建築結構（藍圖）有90層樓，地下6層，樓面面積18萬5,805平方米，設有22層交易樓層，有多達62部電梯。其外型設計與國金一期相似，外牆均為玻璃幕牆，在頂層設計皇冠式和象牙形裝飾，晚間由投射燈照射。

有能力,冇品得唔得?

如果有人問肥龍車仔領隊摩連奴能力勁唔勁,我會答勁. 起碼目標為本, MBO, 英超聯賽近兩屆冠軍手到拿來.

肥龍一直覺得摩連奴管理球隊既其中哲學係"減少犯錯". 特別係D無謂或者係D唔小心既錯,每場比賽如果俾對手少犯錯,基本上已經坐和望贏. 而且以佢既領軍能力及LEADERSHIP, 至少佢可以令班超級球星同佢(球會)賣力及聽從指示,可以話差極有限.

但當肥龍諗起佢賽後拒絕同對賽球隊既領隊握手,在官方網站公開數離隊既球員不是, 輸波/和波時賴球證,賴旁證, 又話球證偏幫對賽球隊或者針對車仔,輸打贏要等等時,真係會覺得係咪有能力就可以冇品? 定係佢怕喺公眾面前表現軟弱既一面呢? 對肥龍黎講,雖則話踢波係落場既十一位球員, 但領隊既功能亦不可少. 另外領隊喺球場內外既一言一行亦會對球員有直接及莫大既影響力. 最怕落得球員有樣學樣,自我澎漲,目中無人,數人家不是.

肥龍作為同事既LEADER,有時亦會諗起呢件事黎警剔自己. 借用森美"黄金少年"既一句話: 有能力就有價值. 但有能力同有價值既同時,有品亦好重要.

二十出頭SHOW

真係好耐無睇SHOW睇得咁開心,笑到出眼淚水.除咗真係好好笑外,呢個SHOW可以引領你完全投入(雖然我係三十出頭,嘿!). 編劇應記一功,能言之有物,笑中有淚.

好幾幕(足球小將,牛仔褸/可口可樂/鈴聲, DJ,"我D字值幾多分?")真係神來之筆, 笑爆咀~~ 不過最感動既一幕係唱"浪淘沙", 勾起不少以往畢業時及謝師宴時既畫面, 更想起以前的中學同學添!

REALLY GOOD SHOW!! 最後花咗$100蚊買咗三寶(場刊,T恤及海報)作為留念.

仲有...做"姑姐"果位演出者真係好似藝員"康華"呀! ;-)

P.S. MARK記> 多謝你既推介!!

嘥哂~~~

個浴缸駛唔駛咁大? 我一個人咋喎..

出TRIP黎呢處真係嘥哂, 有得睇冇得玩!

陽光呀! 海灘呀!!~~~~~ >_<

香港仔要有地鐵?

最近呢個話題好似好重要咁. 各個政黨喺區內不同當眼處貼上各種橫額. 例如"香港仔要有地鐵"呀, "全力爭取地鐵直達南區"呀, 又發起簽名運動, 又舉辦遊行呀.....好似依家南區如果冇咗地鐵就真係好大問題咁.

一個好似幾白痴既問題. 大部份人覺得肥龍梗係儍咗. 有地鐵梗係好啦, 又方便, 又快捷. 再長遠D諗, 因為交通便利,有地鐵令區內物業保值,甚至升值, "再再"長遠D諗, 可能仲會發掘出更多支持有地鐵既論點.

其實作為一個出生同居住在南區三十年有多的路人甲, 相信講到地鐵到唔到南區或者香港仔, 我真係唔CARE...如果你問D喺呢區大既人呢個問題, 相信大部份人會有類似既答案. 咁我有個問題: 點解政黨同民意出入咁大?

除咗因為我係南區長大, 住開有感情, 仲有大部份最好既朋友都係住呢區外, 香港仔或者南區吸引人既地方就係夠LOCAL, 夠街坊, 仲有大量户外空間例如水塘, 郊野公園, 漁港, 沙灘(深水灣, 淺水灣, 南灣, 赤柱等),如果有時間, 仲可以坐街渡去南丫島. 周圍都係山同海, 真係硬SELL自然環境同寧靜. 我唔知其他人搬入呢區居住既原因係咩, 但我相信我剛剛講既應該亦有同感. 而且決定得入黎住, 相信巳經考慮咗交通呢個問題, 所以有冇地鐵係咪咁重要呢? 同埋就算有地鐵, 係咪一定又方便, 又快捷呢?我依家早上上班坐巴士到九龍灣大概45分鐘, 我估如果坐地鐵相信都要35至45分鐘啦.

但當諗起興建時既沙塵滚滚及興建後既上蓋物業....我就....

有關連結:
(維基百科) http://zh.wikipedia.org/wiki/%E5%8D%97%E6%B8%AF%E5%B3%B6%E7%B6%AB
(香港地鐵官方網站 — 南港島綫) http://www.mtr.com.hk/chi/extensions/sil-introduction.htm

給自己的情書

雖然這個標題好似同個BLOG有D 格格不入. 但一直很喜歡這首歌的曲調跟歌詞, 而本身我都幾欣賞林夕既詞.

有次喺聽電台訪問林夕時知道, 這首詞是在他一次剛剛失戀時寫俾他自己的, 係真正 "給自己的" 情書.

聽了後覺得林夕這個人立刻立體起來, 而且從歌詞裹感覺到他的意思, 是那麼直接跟坦誠.

永遠, 用心寫既詞最能觸動人心.

............................................


請　不要灰心　你也會有人妒忌 你　仰望到太高　貶低的只有自己
別　蕩失太早　旅遊有太多勝地 你　記住你髮膚　會與你慶祝鑽禧
請　不要灰心　你也會有人妒忌 你　仰望到太高　貶低的只有自己
別　蕩失太早　旅遊有太多勝地 你　記住你髮膚　會與你慶祝鑽禧

啦啦啦　慰藉自己　開心的東西要專心記起 啦啦啦　愛謢自己　是地上拾到的真理

寫　這高貴情書　用自言自語　作我的天書 　自己都不愛　怎麼相愛　怎麼可給愛人好處
這　千斤重情書　在夜欄盡處　如門前大樹 　沒有他倚靠 歸家也不必撇雨

請　不要哀傷　我會當你是偶像 你　要別人憐愛　先安裝一個藥箱
做　甚麼也好　別為著得到讚賞 你　要強壯到底　再去替對方設想

拋得開手裡玩具　先懂得好好進睡 深谷都攀過後從泥濘尋到這不甘心相信的金句

寫　這高貴情書　用自言自語　作我的天書 自己都不愛　怎麼相愛　怎麼可給愛人好處
這　千斤重情書　在夜欄盡處　如門前大樹 他不可倚靠 歸家也不必撇雨

我要給我寫　這高貴情書　用自言自語　作我的天書 自己都不愛　怎麼相愛　怎麼可給愛人好處
憑著我這　千斤重情書　在夜欄盡處　如門前大樹 沒有他倚靠 歸家也不必撇雨

只會沒有伯樂,不會沒有千里馬

這是相對的說法.

做好事情雖說是份內事,但事情成功就是成功了,就是一般人所謂的"Fit馬"或"好員工".

很多人說懷才不遇,是真還是假?是真的有這麼多嗎? 還是機會未到呢?

我不相信....我只相信"機會"是要等待及要盡力把握的.千里馬就是千里馬.

憑經驗說,伯樂發掘千里馬時,運氣亦十分重要.好多時伯樂當時只知這個人有成為千里馬的條件,但最後是否成功,沒有人(伯樂)能夠去預知,伯樂可以做的就是把成功率做得高一點罷. 而且伯樂亦需要付出時間及心血去栽陪這個人.所以有"先有伯樂,後有千里馬"的說法.

但要成為千里馬,沒有其他途徑,只有自信,實力及努力,沒有運氣.

至於千里馬能否可以把成功在不同時間帶到不同崗位,或是帶到不同公司上,就另當別論了.

It's my life.....

It's a song from Bon Jovi.....

轉工已經兩年有多,由剛到步時部門得四個人,發展至今日九個人.

人多咗, 做既野就唔見多咗, 總覺得有"事倍工半"既失落.

雖然我都覺得大家已經好努力, 但現實既結果話俾大家知離目標仲好有距離, 前面仲有好長既路要走...

有時真係好認真咁諗:究竟好既sales係天生定係可以train出黎呢?如果係可以train,咁又點呢?

點樣或幾時先可以重拾正軌呢?

而每日, 我花不少時間,心機去train, 去coach大家, 但始終覺得大家好似唔緊唔緊咁, 總之就係俾你"試吓囉, 結果唔知呀"果種心態同感覺. 就係唔見要做好件事果d決心同耐性.

係咪我心急呢?

果真如是，是"人在江湖，身不由己"？還是"任勞任怨，死而後已"？話雖如此，我都係選擇做後者．．．唔做野或者無野做都真係好悶...仲有自己知自己事, 你估銀行戶口有大把剩, 唔駛做呀!

The Alchemy of Sales

alchemy

Pseudoscience focused on the attempt to change base metals into gold.

Ancient alchemists believed that, under the correct astrological conditions, lead could be “perfected” into gold. They tried to hasten this transformation by heating and refining the metal in a variety of chemical processes, most of which were kept secret.

實在很喜歡錬金術師這個名詞, 更喜歡"鋼之錬金術師"這套卡通...雖然用上"銷售之錬金術師"或"The Alchemy of Sales" 這個名稱，委實沒有從中想尋找出銷售過程中的錬金術的意思，只是因為工作性質及覺得這個名詞很”pro”，才有這樣的組合吧．．．．